2026-yil 10-aprel kuni Shayxlar saylov okrugidan tuman Kengashiga deputat Akbar Bekchonov tomonidan N34-sonli mahalladagi ekologik holat yuzasidan deputat so‘rovi yuborilgan edi. Unda hududda mavjud qurigan va zararkunandalar bilan zararlangan daraxtlar aholi xavfsizligiga hamda atrof-muhitga salbiy ta’sir ko‘rsatayotgani ta’kidlangan.

Mazkur murojaat asosida tuman Ekologiya va atrof-muhitni muhofaza qilish inspeksiyasi xodimlari tomonidan joyiga chiqib, o‘rganish ishlari olib borildi. O‘rganish natijalariga ko‘ra, so‘rovnomada keltirilgan holatlar to‘liq o‘z tasdig‘ini topdi.

Shundan so‘ng muammoni bartaraf etish maqsadida mahalla fuqarolar yig‘ini raisi boshchiligida mahalla faollari jalb qilinib, hududdagi qurigan va qurt bosgan daraxtlar joyida kesib tashlandi hamda hudud tozalandi.

Shuningdek, tuman Ekologiya va atrof-muhitni muhofaza qilish bo‘limi rahbari A. Qilichev tomonidan hududda ekologik barqarorlikni ta’minlash, yashil hududlarni asrash va kelgusida bunday holatlarning oldini olish yuzasidan tegishli ko‘rsatma hamda amaliy tavsiyalar berildi.

Amalga oshirilgan chora-tadbirlar natijasida mahalladagi ekologik holat yaxshilanib, aholi uchun yanada qulay va xavfsiz muhit yaratildi.