Xalq deputatlari tuman Kengashi deputati D.Ismoilov hamda Kengash kotibiyati bosh mutaxassisi M.Mahmudov tomonidan Besarang mahalla fuqarolar yig‘inida aholini ijtimoiy himoya qilish, kambag‘allikni qisqartirish va bandlikni ta’minlash borasida amalga oshirilayotgan ishlar o‘rganildi.

O‘rganish ishlari 24 ta muhim tavsiya asosida ijtimoiy xodim tomonidan aholiga ko‘rsatilayotgan amaliy ko‘maklarning samaradorligini baholashga qaratildi. Jarayon davomida mahalladagi mavjud muammolar, fuqarolarning murojaatlari, ijtimoiy himoyaga muhtoj oilalar bilan manzilli ishlash, kambag‘allikni qisqartirish, aholi bandligini ta’minlash hamda oilalar daromadini oshirish borasida amalga oshirilayotgan ishlar atroflicha tahlil qilindi.

Ma’lumotlarga ko‘ra, o‘tgan davrda Besarang mahalla fuqarolar yig‘inida jami 59 ta oila Ijtimoiy himoya reyestriga kiritilgan bo‘lib, shundan 18 tasi davlat ta’minotidagi, 39 tasi tegishli reyestrga kiritilgan hamda 2 tasi kambag‘allik chegarasidagi oilalarni tashkil etgan.

O‘rganish davomida mazkur toifadagi oilalarning turmush sharoitini yaxshilash, ularning bandligini ta’minlash va barqaror daromad manbalarini yaratish maqsadida ko‘rilayotgan choralar ham ko‘zdan kechirildi.

Jumladan, amalga oshirilgan manzilli ishlar natijasida 1 nafar fuqaro imtiyozli kredit bilan ta’minlangan bo‘lsa, 2 nafar fuqaroning bandligi ta’minlanib, ularning daromad manbai yaratilgani sababli tegishli reyestrdan chiqarilgan.

O‘rganish yakunida ijtimoiy himoyaga muhtoj oilalar bilan ishlashda manzillilik va individual yondashuvni kuchaytirish, bandlikni ta’minlash orqali oilalarning doimiy daromad manbalarini shakllantirish hamda mavjud muammolarni o‘z vaqtida bartaraf etish yuzasidan tegishli tavsiya va ko‘rsatmalar berildi.