Xalq deputatlari Qo‘qon shahar Kengashi deputati B.Usmanov tomonidan 17-“Marg‘ilon darvozasi” saylov okrugi hududidagi “To‘xlimergan” mahalla fuqarolar yig‘inida jinoyatchilik va huquqbuzarliklarning oldini olish, ularning sodir etilishiga sabab bo‘luvchi omillarni aniqlash hamda O‘zbekiston Respublikasining “Huquqbuzarliklar profilaktikasi to‘g‘risida”gi Qonuni ijrosi yuzasidan o‘rganish ishlari olib borildi.

O‘rganish davomida mahallada huquqbuzarliklarni barvaqt aniqlash va oldini olish, profilaktik hisobda turuvchi fuqarolar bilan manzilli ishlash, ijtimoiy jihatdan ehtiyojmand oilalarni qo‘llab-quvvatlash hamda yoshlar o‘rtasida huquqiy targ‘ibot-tushuntirish ishlarini samarali tashkil etish masalalariga alohida e’tibor qaratildi.

Shuningdek, mahallaga kirish va chiqish nuqtalarida o‘rnatilgan videokuzatuv kameralarining holati, ularning uzluksiz ishlashi, texnik sozligi hamda hududni qamrab olish darajasi ko‘zdan kechirildi.

Huquqbuzarliklarning oldini olishda profilaktika inspektori, mahalla faollari, “Mahalla yettiligi” a’zolari va boshqa mas’ul tuzilmalar o‘rtasidagi hamkorlik holati ham muhokama qilindi.

️Aniqlangan muammolarni bartaraf etish, xavf guruhiga mansub fuqarolar bilan individual profilaktik ishlarni kuchaytirish, yoshlar bilan huquqiy targ‘ibot tadbirlarini muntazam tashkil etish hamda videokuzatuv tizimlaridan samarali foydalanish bo‘yicha tegishli tavsiyalar berildi.

Xalq deputatlari Qo‘qon shahar Kengashi