Xalıq deputatları Bozataw rayonlıq Keńesiniń 8-sanlı "Erkindárya" saylaw okruginen saylanǵan deputat J.Jumanazarov hám Keńes sekretariatınıń bas qánigesi Q.Aytmuratov 5-sanlı balalar baqshasında boldı.
Úyreniwler dawamında deputattı mákeme administraciyası kútip alıp, mektepke shekemgi bilimlendiriw shólkeminiń búgingi jumısın shólkemlestiriw, balalarǵa jaratılǵan sharayatlar hám olardıń qáwipsizligin támiyinlew baǵdarında ámelge asırılıp atırǵan jumıslar haqqında málimleme berdi.
Sonday-aq, baqshalardaǵı sociallıq-turmıslıq sharayatlar, qáwipsizlik talaplarınıń orınlanıwı hám balalar ushın qolaylı ortalıqtı qáliplestiriw boyınsha jumıslar kórip shıǵıldı.

Úyreniwler dawamında deputat balalar baqshasındaǵı balalar ushın jaratılǵan turmıslıq sharayatlarǵa da ayrıqsha itibar qaratıp, olardıń jataq jayların hám qol juwıw ushın belgilengen sanitariyalıq orınlardı birme-bir kózden ótkerdi. Sonday-aq, sanitariyalıq-gigienalıq talaplardıń orınlanıwı, balalar ushın qáwipsiz hám qolaylı ortalıqtı támiyinlew boyınsha ámelge asırılıp atırǵan jumıslardıń jaǵdayı úyrenildi.
Kózden ótkeriw dawamında kanalizaciya sistemasındaǵı aqaba suwlarınıń tolıq tartılmay qalıwı menen baylanıslı kemshilik anıqlanıp, bul másele boyınsha tiyisli ilaj kóriw zárúrligi belgilep alındı.
Anıqlanǵan kemshilikti saplastırıw hám másele boyınsha ámeliy járdem kórsetiw maqsetinde deputat tárepinen rayonlıq Mektepke shekemgi hám mektep bilimlendiriw bólimine deputatlıq soraw jiberiw belgilep alındı. Bul arqalı másele boyınsha tiyisli shólkemlerdiń itibarın tartıp, kanalizaciya sistemasınıń turaqlı islewin támiyinlewge baǵdarlanǵan ámeliy ilaj kóriliwi názerde tutıldı.