Xalq deputatlari Sardoba tumani Kengashi deputati, O‘zbekiston “Adolat” sotsial-demokratik partiyasi tuman kengashi raisi B.Bekmurodov tomonidan Yangiqishloq mahalla fuqarolar yig‘inidagi poliklinikada “Biz giyohvandlikka qarshimiz!” mavzusida targ‘ibot tadbiri o‘tkazildi.
Tadbirdan ko‘zlangan asosiy maqsad aholi, ayniqsa yoshlar o‘rtasida giyohvandlik vositalarining salbiy oqibatlari haqida tushuntirish ishlarini olib borish, sog‘lom turmush tarzini keng targ‘ib qilish hamda jamiyatda ushbu illatga qarshi kurashishda fuqarolarning mas’uliyatini oshirishdan iborat bo‘ldi.
Tadbir davomida giyohvandlik inson salomatligi, oila va jamiyat taraqqiyotiga jiddiy zarar yetkazuvchi omil ekani, uning oldini olishda har bir fuqaroning faol ishtiroki muhim ahamiyat kasb etishi ta’kidlandi.
Shuningdek, ishtirokchilarga giyohvandlikka qarshi kurashish, yoshlarni turli zararli odatlardan asrash, ularning bo‘sh vaqtini mazmunli tashkil etish va sog‘lom hayot tarzini shakllantirish bo‘yicha zarur tavsiyalar berildi.
Tadbir yakunida aholi o‘rtasida sog‘lom muhitni qaror toptirish, giyohvandlik va boshqa salbiy illatlarning oldini olish borasidagi targ‘ibot ishlarini yana-da kengaytirish zarurligi qayd etildi.