Xalq deputatlari Bo‘stonliq tumani Kengashining 2026-yilga mo‘ljallangan ish rejasiga muvofiq O‘zbekiston “Milliy tiklanish” demokratik partiyasidan saylangan deputat M.Aynashova tomonidan tumanning “Pargos” mahallasiga biriktirilgan yoshlar yetakchisi B.Amantaeyv faoliyati o‘rganildi.

O‘rganish jarayonida yoshlarning bandligini ta’minlash, ularni doimiy ish o‘rinlariga joylashtirish, kasb-hunarga o‘qitish, tadbirkorlikka jalb etish hamda bo‘sh vaqtlarini mazmunli tashkil etish bo‘yicha amalga oshirilayotgan ishlar tahlil qilindi.

Shuningdek, mahallada ishsiz yoshlar ro‘yxati, ularning muammolari va ehtiyojlari hamda har bir yosh bilan olib borilayotgan manzilli ishlar muhokama qilindi. Yoshlar yetakchisi tomonidan bandlikni ta’minlash maqsadida tashkil etilgan bo‘sh ish o‘rinlari mehnat yarmarkalari, kasbiy o‘quv kurslariga yo‘naltirish, imtiyozli kreditlar orqali tadbirkorlikni qo‘llab-quvvatlash va o‘zini o‘zi band qilish dasturlari doirasida amalga oshirilayotgan ishlar yuzasidan ma’lumot berildi.

Muhokama davomida har bir ishsiz yosh bilan individual ishlash, ularning qiziqish va salohiyatidan kelib chiqqan holda bandligini ta’minlash bo‘yicha aniq chora-tadbirlarni amalga oshirish yuzasidan tegishli tavsiyalar berildi.