Xalq deputatlari Qo‘qon shahar Kengashi deputati X.Abdullayev tomonidan “Mingtut” mahalla fuqarolar yig‘inida yoshlar yetakchisi I.Tojiyevning O‘zbekiston Respublikasining 2016-yil 14-sentabrdagi O‘RQ-406-sonli “Yoshlarga oid davlat siyosati to‘g‘risida”gi Qonuni ijrosi yuzasidan amalga oshirayotgan ishlari o‘rganildi.

O‘rganish davomida yoshlarni qo‘llab-quvvatlash, ularning ta’lim olishi, bandligini ta’minlash hamda iqtidorli yoshlarni rag‘batlantirish borasida amalga oshirilayotgan ishlar atroflicha tahlil qilindi. Xususan, Qonun ijrosi doirasida 2 nafar talaba — A.Abdullayev va A.Valiyevning kontrakt to‘lovlari qoplab berilgani, shuningdek, ijtimoiy himoyaga muhtoj 8 nafar yosh bepul kasb-hunarga o‘qitish kurslariga jalb etilgani ma’lum qilindi.

Shuningdek, mahalladagi yoshlarning sport sohasidagi yutuqlariga alohida e’tibor qaratildi. Jumladan, mahallaning 8 nafar yoshlari turli sport musobaqalarida faxrli 1-o‘rinlarni qo‘lga kiritgani qayd etilib, yoshlar o‘rtasida sog‘lom turmush tarzini targ‘ib etish va ularning bo‘sh vaqtini mazmunli tashkil etish borasida olib borilayotgan ishlar e’tirof etildi.

O‘rganish jarayonida mahalla yoshlari vakili, taekvondo sport turi bo‘yicha sport ustasi Abdusalimova Muborakhon tomonidan mahalla hududida sport to‘garagi tashkil etish uchun amaliy yordam ko‘rsatish yuzasidan murojaat bildirildi. Mazkur murojaat deputat tomonidan nazoratga olinib, tegishli tashkilotlar bilan hamkorlikda ushbu tashabbusni qo‘llab-quvvatlash va zarur yordam ko‘rsatish bo‘yicha kelishuvga erishildi.

Xalq deputatlari Qo‘qon shahar Kengashi