Bahor mahallasida ijtimoiy xodim faoliyati o‘rganildi

Xalq deputatlari Navoiy shahar Kengashi deputati Tasheva Shaxnoza Azamatovna xizmat safarida bo‘lganligi munosabati bilan tasdiqlangan grafik reja asosida Xalq deputatlari Navoiy shahar Kengashi kotibiyati bosh mutaxassisi M. Astanova tomonidan Bahor mahallasida faoliyat yuritayotgan ijtimoiy xodim Zayniddinov Xislat Qurbonovichning xizmat faoliyati o‘rganildi.

O‘rganish jarayonida aholining ijtimoiy ehtiyojmand toifalariga ko‘rsatilayotgan ijtimoiy xizmatlarning sifati, kam ta’minlangan oilalarga ijtimoiy nafaqalar hamda moddiy yordam tayinlash va to‘lash tartibiga rioya etilishi, shuningdek, murojaatlarni qabul qilish va ko‘rib chiqish amaliyoti hamda xizmat hujjatlarining yuritilishi amaldagi qonunchilik talablari asosida tahlil qilindi.

Shuningdek, manzilli ijtimoiy qo‘llab-quvvatlash chora-tadbirlarining amalga oshirilishi, ehtiyojmand fuqarolar bilan ishlash tizimi va ijtimoiy xizmatlar ko‘rsatish samaradorligi o‘rganildi.

O‘rganish davomida 2026-yil mobaynida mahalla bo‘yicha 56 nafar fuqaro Kambag‘allik reyestriga kiritilgani hamda ularning barchasiga belgilangan tartibda ijtimoiy yordam va moddiy ko‘mak tayinlanganligi aniqlandi. Shuningdek, mahallada 6 nafar yakka yolg‘iz fuqaro ro‘yxatga olingan bo‘lib, ularga tasdiqlangan reja asosida biriktirilgan assisentlar tomonidan ijtimoiy xizmatlar muntazam va uzluksiz ravishda ko‘rsatib kelinayotgani o‘z tasdig‘ini topdi.

O‘rganish yakunlari bo‘yicha ijtimoiy xizmatlarni yanada samarali tashkil etish, aholiga ko‘rsatilayotgan xizmatlar sifatini oshirish hamda amaldagi qonunchilik va belgilangan tartib-taomillarga qat’iy rioya etilishini ta’minlash yuzasidan tegishli tavsiyalar berildi.