Кәсипке инвестиция - келешекке инвестиция

Бүгинги күнде мийнет базары тез пәтлер менен өзгермекте. Жаңа технологиялар ҳәм заманагөй кәсиплер болса турақлы түрде жаңа билим ҳәм көнликпелерди талап етпекте. Сонлықтан Президент Шавкат Мирзиёев тәрепинен жаслар ушын "Кәсиплик ваучер" системасының енгизилиўи өз ўақтында қабыл етилген әҳмийетли баслама болып есапланады.

Процентсиз ссуда түринде берилетуғын бул ваучер арқалы ҳәр жылы 50 мың жас халықаралық стандартларға сәйкес кәсиплерди үйрениў имканиятына ие болады. Бул тек ғана жаслардың билим ҳәм маманлығын арттырып қоймастан, ал олардың мүнәсип жумыс табыўы, жоқары дәраматлы жумыс пенен шуғылланыўы ҳәм мәмлекет экономикасының раўажланыўына үлес қосыўына да хызмет етеди.

Инсан капиталына инвестиция киргизиў - ҳәр қандай мәмлекеттиң ең дурыс таңлаўы болып есапланады. "Кәсиплик ваучер" де тап усы мақсетке хызмет етеди. Себеби, маман, билимли ҳәм интакер жаслар Жаңа Өзбекстанның ең үлкен таянышы болып есапланады.
Енди жаслар алдында әҳмийетли ўазыйпа тур: жаратылған имканияттан ақылға уғрас пайдаланыў, өз үстинде ислеў.

Айтгул ЖОЛЫМБЕТОВА,
Халык депутатлары Мойнак районлык кенеси депутаты, ОзХДП депутатлык топары агзасы