Yoshlarga oid davlat siyosati to‘g‘risidagi qonun ijrosi o‘rganildi

Xalq deputatlari Muzrabot tumani Kengashi huzurida tashkil etilgan Yoshlar maslahat guruhi a’zolari tomonidan tuman Kengashining Ijtimoiy soha, yoshlar siyosati, madaniyat va sport masalalari bo‘yicha doimiy komissiyasi a’zolari bilan hamkorlikda tumandagi Maktabgacha va maktab ta’limi bo‘limida O‘zbekiston Respublikasining “Yoshlarga oid davlat siyosati to‘g‘risida”gi Qonuni ijrosi yuzasidan o‘rganish ishlari olib borildi.

O‘rganish jarayonida ishlab chiqilgan savolnoma asosida muassasada yoshlarga oid davlat siyosati ijrosini ta’minlash bo‘yicha mas’ul shaxs faoliyati, tasdiqlangan chora-tadbirlar rejalari, yoshlar bilan ishlash bo‘yicha yillik va choraklik rejalarning bajarilishi hamda qonunchilik hujjatlarining mazmun-mohiyatini xodimlar va yoshlarga yetkazish holati tahlil qilindi.

O‘rganish davomida o‘quvchilarning bo‘sh vaqtlarini mazmunli tashkil etish maqsadida faoliyat yuritayotgan fan, sport, madaniyat va san’at to‘garaklari, ularga qamrab olingan yoshlar soni hamda kitobxonlikni rivojlantirish bo‘yicha amalga oshirilayotgan ishlarga alohida e’tibor qaratildi.

Shu bilan birga, yoshlar o‘rtasida huquqbuzarliklar profilaktikasi, xavf guruhiga kiruvchi o‘quvchilar bilan olib borilayotgan ishlar, huquqiy savodxonlikni oshirishga qaratilgan tadbirlar hamda ichki ishlar organlari va mahallalar bilan hamkorlik holati tahlil qilindi.

O‘rganish yakunlari bo‘yicha aniqlangan holatlar yuzasidan tegishli xulosalar shakllantirildi hamda qonun ijrosini yanada samarali ta’minlash, mavjud kamchiliklarni bartaraf etish va yoshlar bilan ishlash tizimini takomillashtirish bo‘yicha taklif va tavsiyalar berildi.

Xalq deputatlari Muzrabot tumani Kengashi huzuridagi Yoshlar maslahat guruhi tomonidan bu kabi o‘rganishlar muntazam ravishda davom ettirilib, yoshlarga oid davlat siyosati ijrosi ustidan jamoatchilik va deputatlik nazoratini kuchaytirishga alohida e’tibor qaratiladi.