Xalq deputatlari Bo‘stonliq tumani Kengashining 2026-yilga mo‘ljallangan Ish rejasiga muvofiq  Kengash raisi O.Babayev tomonidan tumandagi yirik sanoat korxonalaridan biri bo‘lgan “G‘azalkent-Meva” MChJ faoliyati o‘rganildi. O‘rganish jarayonida korxonaning ishlab chiqarish quvvatlari, amalga oshirilayotgan modernizatsiya ishlari, investitsiya loyihalari hamda yangi ish o‘rinlari yaratish bo‘yicha rejalari tahlil qilindi.

🔺Ma’lumotlarga ko‘ra, “G‘azalkent-Meva” korxonasi Bo‘stonliq tumanining oziq-ovqat sanoatida muhim o‘rin egallaydigan korxonalardan biri hisoblanadi. Korxona asosan mahalliy meva-sabzavot xomashyosini qayta ishlashga ixtisoslashgan bo‘lib, tomat pastasi, turli xil konservalangan mahsulotlar, marinadlangan sabzavotlar, meva sharbatlari, meva bo‘tqalari hamda bolalar oziq-ovqatlari ishlab chiqarish yo‘nalishlarida faoliyat yuritadi.

🔺Korxona tarixi o‘tgan asrning o‘rtalariga borib taqaladi. Yillar davomida ishlab chiqarish quvvatlari bosqichma-bosqich kengaytirilib, xorijiy texnologiyalar joriy etilgan. Xususan, Italiya texnologiyalari asosida tomat pastasi ishlab chiqarish liniyasi hamda meva mahsulotlarini qayta ishlash sexlari tashkil etilgan.

🔺Bugungi kunda korxonada ishlab chiqarish hajmini yanada oshirish maqsadida Xitoy texnologiyalari asosida mavjud sexlarni rekonstruksiya qilish va zamonaviy uskunalar bilan jihozlash ishlari amalga oshirilmoqda. Loyiha doirasida mahsulot turlarini ko‘paytirish, eksportbop mahsulotlar ishlab chiqarish hajmini oshirish va energiya tejovchi texnologiyalarni joriy etish rejalashtirilgan.

🔺O‘rganish davomida mas’ullar tomonidan ta’kidlanishicha, korxonani kengaytirish loyihasi to‘liq amalga oshirilgach, yangi ishlab chiqarish quvvatlari yaratiladi va qo‘shimcha ish o‘rinlari tashkil etiladi. Bu esa aholi, ayniqsa yoshlar va xotin-qizlarni doimiy bandlik bilan ta’minlashga xizmat qiladi.

🔺Deputat korxonada yaratilayotgan shart-sharoitlar, mehnat muhofazasi talablariga rioya etilishi, ishchilar uchun ijtimoiy kafolatlar hamda mahalliy xomashyoni chuqur qayta ishlash imkoniyatlari bilan tanishdi. Shuningdek, ishlab chiqarish hajmini oshirish, mahsulot sifatini xalqaro standartlarga moslashtirish va eksport geografiyasini kengaytirish bo‘yicha taklif va tavsiyalar berildi.