“Katta qani” MFYda navbatdagi fuqarolar qabuli o‘tkazildi

🇺🇿 Xalq deputatlari Uchtepa tumani Kengashiga O'zLiDePdan saylangan “15-Izza” okrugi deputati Narziyev Akbar Ma’rupovich tomonidan tuman hokimligi mas’ul rahbarlari bilan birgalikda saylangan hududda navbatdagi fuqarolar qabuli tashkil etildi.

💬 Fuqarolar qabuli “Katta qani” mahalla fuqarolar yig‘inida o‘tkazilib, unda fuqarolarning murojaat va takliflari tinglanib, hududdagi mavjud muammolar muhokama qilindi.

📝 Mazkur qabulda xalq deputatlari Uchtepa tumani Kengashi kotibiyati bosh mutaxassisi U.Abilov, tuman hokimligining qurilish va to‘siqlarsiz muhit yaratish masalalari kompleksi bosh mutaxassisi A.Arziyev, tuman “Suvsoz” bo‘limi bosh muhandisi va tuman tibbiyot birlashmasi rahbari U.Karabayev ishtirok etib, fuqarolar murojaatlarini tinglashdi hamda ayrim masalalar yuzasidan joyida tushuntirish va yechimlar berildi.

💼 Qabul davomida Qurilish ko‘chasi 45-uyda yashovchi fuqaro Dilmurod Tojiboyev sog‘lig‘i bilan bog‘liq murojaat qilib, oyoq va bel qismidagi suyak yemirilishi sababli operatsiya va davolanish masalasida amaliy yordam so‘radi. Mazkur murojaat yuzasidan mutasaddi tashkilotlarga tegishli topshiriqlar berildi.

📇 Shuningdek, Qurilish ko‘chasi 76-uyda yashovchi fuqaro Shuhrat Turapov tomonidan 203-maktab chorraxasi hamda 452-sonli DMTT oldida piyodalar xavfsizligini ta’minlash maqsadida beton bordyur, piyodalar o‘tish belgisi va yo‘l chiziqlarini tashkil etish bo‘yicha murojaat bildirildi.

🗣 “Katta qani-2” ko‘chasi 4A-uyda yashovchi fuqaro Abduvali Majidov tomonidan suv hisoblagichlarini almashtirgandan so‘ng, ularni ro‘yxatdan o‘tkazish va ortiqcha to‘lovlar hisoblanayotgani yuzasidan murojaat qilindi. Ushbu masalani tegishli tashkilotlar bilan hamkorlikda o‘rganish belgilandi.

🗂 Bundan tashqari, Izza ko‘chasi 19-uyda yashovchi fuqaro Shahnoza Rahmatova tomonidan Izza 1-tor ko‘chasidagi oqova suv muammosi ko‘tarildi. Ta’kidlanishicha, hududdagi 150 ga yaqin xonadon kanalizatsiya tarmog‘iga ulangan bo‘lib, kuchli yog‘ingarchilik vaqtida oqova suvlarning ayrim xonadonlarga toshib kirishi kuzatilmoqda. Mazkur muammoni bartaraf etish maqsadida mutasaddilarga tegishli topshiriqlar berildi.

📁 Shuningdek, uchrashuvdan so‘ng mahalla hududida o‘rganish ishlari olib borilib, drenaj tizimi holati hamda fuqarolarni qiynayotgan boshqa muammolar joyiga chiqqan holda ko‘zdan kechirildi. Aniqlangan kamchiliklar yuzasidan mas’ullarga topshiriqlar berilib, ijrosi deputat nazoratiga olindi.