Samarqand shahar, “Yangi Xayrabod” MFY, Anqaboy ko‘chasi 15-A manzilida joylashgan turar-joy binosi YUNESKOning Umumjahon merosi ro‘yxatiga kiritilgan Samarqand shahrining tarixiy-me’moriy qo‘riqxona hududida joylashgan.

Shu munosabat bilan, O‘zbekiston Respublikasi Prezidentining 2021-yil 19-iyundagi PQ-5150-son qaroriga muvofiq, moddiy madaniy merosning ko‘chmas mulk obyektlarida, alohida muhofaza qilinadigan tarixiy-madaniy hududlarda hamda Umumjahon merosi ro‘yxatiga kiritilgan hududlarda qurilish, buzish va obodonlashtirish ishlarini amalga oshirish loyihalari vakolatli organlar bilan majburiy tartibda kelishilishi lozim.

Xususan, mazkur hududlarda amalga oshiriladigan har qanday loyiha dastlab Madaniy meros agentligi bilan kelishiladi hamda tegishli tartibda YUNESKOning Umumjahon merosi markazi bilan ham muvofiqlashtiriladi.

Bundan tashqari, O‘zbekiston Respublikasi Vazirlar Mahkamasining 2024-yil 20-maydagi 295-son qarorining 38-bandiga asosan, loyiha taklifi vakolatli boshqarmaga taqdim etilgandan so‘ng, u Madaniy meros agentligi huzuridagi Ilmiy-ekspert kengashida ko‘rib chiqilib, tegishli tavsiya va xulosa olinadi.

Yuqoridagilardan kelib chiqib, fuqaro tomonidan bildirilgan murojaatni ijobiy hal etish uchun belgilangan tartibda loyiha hujjatlarini tayyorlab, vakolatli tashkilotlarga taqdim etish zarurligi tushuntiriladi.

Mazkur jarayon doirasida amaliy yordam ko‘rsatish masalasi qonunchilik talablariga muvofiq ko‘rib chiqiladi.