Өзбекстанда жаслардың бәнтлигин тәмийинлеў, олардың билимлендириў ҳәм социаллық белсендилигин қоллап-қуўатлаўға қаратылған мәмлекетлик сиясатта және бир әҳмийетли қәдем қойылды. Президентимиздиң усы жыл 20-ноябрьде “Жаслар дәптери” қорлары арқалы социаллық жәрдем көрсетиў системасын буннан былай да жетилистириў ҳаққында”ғы
пәрманы қабыл етилген еди, бул ҳүжжет жаслар менен ислесиў тараўындағы қолланбаларды жаңа басқышқа алып шығыўға қаратылған болып, бағдарламаларды нәтийжели, мәнзилли ҳәм нәтийжеге бағдарланған ҳалда әмелге асырыўды нәзерде тутылған. Пәрманда бир қатар стратегиялық мақсетлер белгиленип, соның ишинде, бәнтликти тәмийинлеў “Жаслар
дәптери”не киргизилген 16 мың жастың турақлы дәрамат дерегине ийе болыўына жәрдемлесиў мақсет етип қойылған. Бул арқалы жаслардың мийнет базарындағы қатнасын күшейтиў, өзин-өзи бәнт етиў имканиятларын кеңейтиў нәзерде тутған.

“Оқыў” жойбары шеңберинде жаслар арасында илимий-ғалабалық ҳәм көркем әдебият оқыў менен шуғылланыўшылардың үлесин 10 процентке арттырыў режелестирилген. Бул ўазыйпа жасларда пикирлеў мәдениятын, сөйлеўди ҳәм билим шеңберин күшейтиўге хызмет етеди. “Ибрат перзентлери” жойбары арқалы шет тиллерди өзлестирген жаслардың үлесин 30 процентке арттырыў нәзерде тутылған. Заманагөй мийнет базарында тил билиў бәсекиге шыдамлылықтың тийкарғы факторларынан бири болып атырғаны инабатқа алынған.

2026-жыл 1-февральдан баслап, социаллық жәрдем түрлери Кәмбағал шаңарақлар реестриндеги шаңарақларда тәрбияланып атырған жасларға социаллық шәртнама тийкарында бериледи. Яғный, жаслар мәмлекетлик жәрдемди алыў ушын төмендеги талапларды орынлаўы зәрүр, билимлендириўди үзликсиз даўам еттириў, оқыўда унамлы нәтийжелерге ерисиў,
волонтёрлық жумысында қатнасыў, “Бес баслама олимпиадасы” жойбарларында қатнасыў зәрүрлиги атап өтилген.

Бул қатнас жасларды тек ғана социаллық жәрдем алыўшы емес, ал белсенди ҳәм жуўапкер қатнасыўшы сыпатында тәрбиялаўды мақсет етеди. Социаллық шәртнама талаплары орынланбаған жағдайда, мәмлекетлик жәрдем тәртипли түрде шекленеди. Бәринен бурын, 15 күнлик ескертиў бериледи. Талаплар орынланбаса, жәрдем муғдары 15-30 процентке шекем азайтылады. Айырым жағдайларда жәрдем 1 айдан 6 айға шекем ўақтынша тоқтатылады. Пүткиллей орынланбаған жағдайда, жәрдем 1 жыл ҳәм оннан артық мүддетке
тоқтатылыўы мүмкин. Бул механизм жасларды жуўапкершиликли, системалы ҳәм тәртипли болыўға шақыратуғынлығы атап өтилген ҳәм бул жаслар арасында ҳәр қыйлы унамсыз иллетлердиң, ҳуқықбузарлық, жынаятшылықлардың алдын алыўда да өз нәтийжесин береди.

Социаллық шәртнама талапларын кеминде 6 ай даўамында жоқары дәрежеде орынлаған жаслар бир қатар жеңилликлерге ийе болады. Нәўбеттен тысқары социаллық жәрдем алыў ҳуқықы, ҳәр жылы ең белсенди 1 000 жасқа БЕМниң 3 есеси муғдарында ақшалай сыйлық, интакер ҳәм белсенди жаслар арнаўлы сыйлықларға усыныс етиледи. Бул хошаметлеўлер
арқалы мәмлекет жаслар арасында саламат бәсеки ҳәм белсендилик орталығын қәлиплестириўди мақсет етеди.

Бир сөз бенен айтқанда, Президенттиң бул пәрманы жаслардың социаллық белсендилигин ҳәм мийнет базарына таярлығын арттырыўға қаратылған. Социаллық жәрдемниң шәртнама тийкарында берилиўи болса системаның нәтийжелилигин күшейтеди, жаслардың белсенди, жуўапкершиликли ҳәм интакер инсанлар болып жетилисиўине хызмет етеди ҳәм бул
жаслар арасында ҳәр қыйлы унамсыз иллетлердиң, ҳуқықбузарлық, жынаятшылықлардың алдын алыўда да өз нәтийжесин береди. Бул өзгерислер мәмлекетте жаслар сиясаты және де тийкарғы бағдар сыпатында әмелге асырылып атырғанын, мәмлекет тәрепинен жас әўладтың келешегине үлкен итибар қаратылып атырғанын және бир мәрте көрсетпекте буннан жасларымыз өзлериниң келешек жолларын дурыс таңлаўға ҳәмде олардың мәмлекетимиз ушын хызмет ететуғынлығына исенимимиз кәмил