Birlashgan Millatlar Tashkiloti Bosh Assambleyasining 2003-yil 21-noyabrdagi rezolyutsiyasiga muvofiq, 2004-yildan boshlab “9 dekabr – Butun jahon korrupsiyaga qarshi kurashish kuni” sifatida nishonlab kelinmoqda.  

Har yili 9-dekabr dunyo miqyosida Xalqaro korrupsiyaga qarshi kurashish kuni sifatida nishonlanadi. Ushbu sana korrupsiyaning jamiyat taraqqiyotiga, iqtisodiy rivojlanishga, fuqarolarning davlatga bo‘lgan ishonchiga qanday zarar yetkazishini yana bir
bor eslatib turadi. Korrupsiya-davlat boshqaruvi ochiqligi va adolatiga qarshi qaratilgan eng xavfli illatlardan biridir. U nafaqat iqtisodiy yo‘qotishlarga, balki eng asosiysi, jamiyatdagi ishonch muhitining yemirilishiga olib keladi. Shu sababli, korrupsiyaga qarshi kurashish har bir davlat oldida turgan muhim va dolzarb vazifadir. 

So‘nggi yillarda O‘zbekistonda korrupsiyaga qarshi kurashish davlat siyosatining ustuvor yo‘nalishiga aylangan. Bu borada kompleks islohotlar amalga oshirilmoqda: 

2020-yilda O‘zbekiston Respublikasi Prezidentining farmoniga binoan “Korrupsiyaga qarshi kurashish agentligi” tashkil qilindi. Agentlik davlat idoralarida shaffoflikni oshirish, korrupsiyaviy xavflarni baholash va oldini olish bo‘yicha muhim vakolatlarga ega. 

“Hamma narsa ochiq bo‘lsa-korrupsiya bo‘lmaydi” tamoyili asosida bir qator tizimlar joriy etildi. Davlat xizmatlari markazlari va “my.gov.uz” portali orqali xizmatlarning elektron shaklga o‘tkazilishi, tender va davlat xaridlarining “ochiq e-auksionlar” orqali amalga oshirilishi, budjet ma’lumotlarining “Ochiq budjet” portali orqali jamoatchilikka taqdim etilishi, bu choralar inson omili aralashuvini kamaytirib, shaffoflikni oshirishga xizmat qilmoqda. 

“Korrupsiyasiz soha” loyihalari bo‘yicha ta’lim, sog‘liqni saqlash, bojxona, soliq, ichki ishlar kabi ijtimoiy ahamiyatga ega sohalarda korrupsion xavflarni bartaraf etishga qaratilgan “Korrupsiyasiz soha” loyihalari amalga oshirilmoqda. Mazkur loyiha doirasida jarayonlarni raqamlashtirish, xizmatlarni avtomatlashtirish, nazorat mexanizmlarini kuchaytirish kabi chora-tadbirlar ko‘rilmoqda. 

Fuqarolar, jurnalistlar va nodavlat tashkilotlarning korrupsiyaga qarshi kurashdagi roli oshirildi. Bugungi kunda, davlat idoralari faoliyati bo‘yicha ochiq hisobotlar, jurnalistlar uchun axborot olishning kafolatlangan huquqi, korrupsion holatlar yuzasidan “onlayn murojaat platformalari” keng joriy etilgan. 

Davlat tomonidan amalga oshirilayotgan keng ko‘lamli islohotlarga qaramay, korrupsiyaga qarshi kurash faqat davlat idoralarining vazifasi emas. Jamiyatdagi har bir fuqarodan qonunlarga hurmat, halollik tamoyiliga sodiqlik, mas’uliyat va faollik talab etiladi. 

Korrupsiya-har qanday davlat rivoji uchun xavfli to‘siq. O‘zbekistonda bu illatga qarshi qat’iy siyosat yuritib, halollik muhitini shakllantirish, davlat boshqaruvida ochiqlik va shaffoflikni kuchaytirishga alohida e’tibor qaratilmoqda. 9-dekabr sanasi esa
mazkur jarayonlar dolzarbligini yana bir bor yodga soladi. 

Halollik-taraqqiyotning poydevori, korrupsiyasiz jamiyat esa ertangi kunimizning ishonchli kafolatidir. 

S.Bekmurodova
Zomin tuman Kengashi deputati 

Sud huquq masalallari va korrupsiyaga qarshi kurashish
masalalari bo‘yicha doimiy komissiyasi a’zosi