Xalq deputatlari Chinoz tumani Kengashiga O'zMTDP partiyasidan 5-Paxtaobod saylov okrugidan saylangan deputat Surayyo Axmedova tumanda amalga oshirilayotgan investitsiya loyihalari hamda ularning ijtimoiy-iqtisodiy ahamiyatini o‘rgandi.

O‘rganishlar davomida ma’lum bo‘lishicha, Chinoz tumanida turizm sohasini jadal rivojlantirish, sayyohlar uchun zamonaviy va qulay infratuzilma yaratish hamda xizmatlar sifatini oshirish maqsadida qator investitsiya loyihalari amalga oshirilmoqda. Ushbu loyihalar doirasida dam olish maskanlarini barpo etish, turistik marshrutlarni takomillashtirish, avtomobil yo‘llari hamda muhandislik-kommunikatsiya tarmoqlarini yaxshilash, shuningdek, zamonaviy xizmat ko‘rsatish obyektlarini tashkil etish ishlari izchil olib borilmoqda.
Bu borada “DAVRON BAXT QUSHI AVTO” mas’uliyati cheklangan jamiyatining faoliyati alohida e’tiborga loyiq. Korxona o‘z faoliyatini yaqinda boshlaganiga qaramasdan, bugungi kunda JAK rusumli 8 ta zamonaviy mikroavtobus orqali tuman aholisiga sifatli transport xizmati ko‘rsatib kelmoqda. Korxona yaqin istiqbolda yana 10 ta shunday mikroavtobus olib kelishni rejalashtirgan.

Loyihaning asosiy maqsadi ekoturizmni rivojlantirish, ichki turizm salohiyatini yanada oshirish hamda aholi va sayyohlar orasida ekologik madaniyatni yuksaltirishdan iborat. Shu bilan birga, atrof-muhitni muhofaza qilish, tabiatga ehtiyotkorona munosabatda bo‘lish va ekologik tozalikni ta’minlash g‘oyalarini keng targ‘ib etishga ham alohida e’tibor qaratilmoqda.

Investitsiya loyihalari natijasida yangi ish o‘rinlari ham yaratilmoqda. Xususan, mazkur korxonada hozirning o‘zida 12 ta yangi ish o‘rni tashkil etildi. Mahalliy aholi, ayniqsa, mehnat qilish istagida bo‘lgan yoshlar ish bilan ta’minlanib, ularning bandligini oshirishga munosib hissa qo‘shilmoqda. Shuningdek, hududning turistik salohiyatini yanada yuksaltirishga xizmat qiluvchi zarur infratuzilma bosqichma-bosqich shakllantirilmoqda.

Turizm sohasiga yo‘naltirilayotgan investitsiyalar hudud iqtisodiyotining barqaror rivojlanishi, ichki va xorijiy sayyohlar oqimining ortishi, aholi bandligi hamda daromadlarining ko‘payishiga xizmat qilishi bilan ahamiyatlidir. Kelgusida ham yangi investitsiya loyihalarini amalga oshirish orqali Chinoz tumanining turistik jozibadorligini yanada oshirish, uni mamlakatning istiqbolli turistik hududlaridan biriga aylantirish rejalashtirilgan.