BOZORLARDA OZIQ-OVQAT MAHSULOTLARI NARX-NAVOSI VA YETARLILIGI O‘RGANILDI

Xalq deputatlari Navoiy shahar Kengashi kotibiyati mudiri J. Hafizov hamda Xalq deputatlari Navoiy shahar Kengashi deputati B. Umarovlar tomonidan Navoiy shahridagi “Sahovat” bozorida oziq-ovqat mahsulotlari narx-navosi hamda ularning aholiga yetarlilik darajasini o‘rganish bo‘yicha monitoring ishlari olib borildi.

Mazkur o‘rganishdan ko‘zlangan asosiy maqsad — bozorlarda aholining kundalik iste’moli uchun zarur bo‘lgan asosiy turdagi mahsulotlar narxlarining barqarorligini ta’minlash, sun’iy narx oshishlarining oldini olish hamda mahsulotlar ta’minotini nazorat qilishdan iborat bo‘ldi.

Monitoring jarayonida bozordagi savdo rastalari faoliyati ko‘zdan kechirilib, un, yog‘, go‘sht, sut mahsulotlari, sabzavot va mevalar kabi asosiy oziq-ovqat mahsulotlarining narxlari o‘rganildi. Shu bilan birga, mahsulotlarning sifati, saqlanish sharoitlari hamda bozordagi umumiy ta’minot holatiga alohida e’tibor qaratildi.

O‘rganish davomida ayrim mahsulotlar narxlarida o‘zgarishlar kuzatilgani qayd etilib, narx-navoning asossiz oshirilishiga yo‘l qo‘ymaslik yuzasidan savdo rastalari egalariga tegishli tavsiyalar berildi. Shuningdek, bozorda mahsulotlar yetarliligi ta’minlangani, aholiga zarur oziq-ovqat mahsulotlari uzluksiz yetkazib berilayotgani ta’kidlandi.Mas’ul shaxslar tomonidan tadbirkorlar va sotuvchilar bilan suhbatlar o‘tkazilib, aholiga sifatli, xavfsiz hamda hamyonbop mahsulotlar taklif etish, savdo madaniyatiga rioya qilish muhimligi alohida qayd etildi.Monitoring yakunlariga ko‘ra aniqlangan kamchiliklarni bartaraf etish, narx-navoni barqaror saqlash hamda bozorlar faoliyatini yanada takomillashtirish bo‘yicha tegishli choralar belgilab olindi.Umuman olganda, olib borilgan o‘rganish ishlari aholi manfaatlarini himoya qilish, oziq-ovqat xavfsizligini ta’minlash hamda bozorlarda sog‘lom raqobat muhitini shakllantirishda muhim ahamiyat kasb etadi.