O‘zbekiston Respublikasi Prezidentining PK–393 sonli qaroriga muvofiq, tumanimizda bir qator ijtimoiy obyektlarda rekonstruksiya qilish va qo‘shimcha binolar qurish ishlari amalga oshirilmoqda.

Shu munosabat bilan xalq deputatlari tuman Kengashi deputati Maqsud Kazakov tomonidan «Al-Beruniy» oilaviy shifokorlik punktida olib borilayotgan rekonstruksiya ishlari o‘rganildi.

Loyiha doirasida mavjud 50 qatnovli binoni 1-tipdagi oilaviy poliklinika talablariga moslashtirish ishlari amalga oshirilmoqda.

O‘rganish jarayonida qurilish ishlarining sifati, belgilangan muddatlarga rioya qilinishi hamda aholi uchun yaratiladigan qulayliklar yuzasidan mas’ullarga tegishli tavsiya va takliflar berildi.

Aholiga sifatli tibbiy xizmat ko‘rsatish imkoniyatlarini kengaytirishga qaratilgan mazkur loyihalar deputatlik nazoratida bo‘lib, qurilish ishlarining o‘z vaqtida va sifatli yakunlanishiga alohida e’tibor qaratilmoqda.