Kosonsoy tumani Iftixor MFY hududida joylashgan Kosonsoy–To‘raqo‘rg‘on avtomobil yo‘lidan mahallaga kirish qismidagi ko‘prikni kengaytirish, yo‘l harakati xavfsizligini ta’minlash hamda hududni obodonlashtirish maqsadida mahalla aholisi tashabbusi bilan umumxalq hashari tashkil etildi.

Hashar jarayonida Xalq deputatlari Kosonsoy tuman Kengashi 7-Shirinbuloq saylov okrugi deputati A.Dadajonov ham ishtirok etib, olib borilayotgan ishlar bilan yaqindan tanishdi hamda fuqarolar bilan muloqot qildi. Deputat tomonidan hudud infratuzilmasini yaxshilash, aholi uchun yanada qulay va xavfsiz sharoitlar yaratish borasidagi tashabbuslar qo‘llab-quvvatlanishi ta’kidlandi.

Hashar davomida ushbu ko‘chada istiqomat qiluvchi fuqarolar birlashib, ko‘prikni kattalashtirish va yo‘lni kengaytirish ishlari uchun zarur tayyorgarlik tadbirlarini amalga oshirdilar. Shuningdek, yo‘l bo‘ylarini tartibga keltirish, ortiqcha chiqindilarni tozalash va hududning sanitariya holatini yaxshilash bo‘yicha ham keng ko‘lamli ishlar bajarildi.

O‘rganish jarayonida deputat A.Dadajonov tomonidan mazkur ko‘chaning transport qatnovi uchun muhim ahamiyatga ega ekani, ko‘prikning kengaytirilishi va yo‘lning obodonlashtirilishi nafaqat mahalla aholisi, balki ushbu yo‘nalishdan foydalanuvchi barcha fuqarolar uchun qulaylik yaratishi qayd etildi.

Mazkur tashabbus mahalla infratuzilmasini yanada yaxshilash, transport vositalari va piyodalar harakati uchun qulay sharoit yaratish, eng muhimi, fuqarolarning birdamligi va hamjihatligini namoyon etishda muhim ahamiyat kasb etmoqda.

Mahalla faollari, nuroniylar va yoshlar tomonidan bunday xayrli ishlar kelgusida ham davom ettirilishi, hududni yanada obod va fayzli maskanga aylantirish yo‘lida hamkorlik mustahkamlanishi ta’kidlandi.

✅ Obod mahalla — farovon hayot garovi. Iftixor MFY aholisining ushbu ezgu tashabbusi hamjihatlik va fidoyilikning yorqin namunasi bo‘lib xizmat qilmoqda.

👉 Bizni ijtimoiy tarmoqlarda kuzatib boring!

Rasmiy sayt|📱 Telegram|📱 Facebook| 📱 Instagram| 📱 Youtube