Mamlakatimiz rahbari tomonidan ilgari surilayotgan tashabbuslar nafaqat yurtimiz, balki butun insoniyat taqdiri uchun muhim ahamiyatga ega. Prezidentimiz raqamli rivojlanish va sun’iy intellektdan foydalanish jarayonlarida davlatlar o‘rtasida tengsizlik yuzaga kelmasligi kerakligini ta’kidlab, barcha uchun adolatli va ochiq imkoniyatlarni ta’minlash zarurligini qayd etdilar.

Shuningdek, sog‘liqni saqlash, ta’lim va madaniyat sohalarida sun’iy intellektning amaliy yechimlari va modellarini beg‘araz almashishga qaratilgan Xalqaro hamkorlik mexanizmini yaratish taklifi ham juda dolzarbdir. Bu tashabbus insonparvarlik va hamjihatlikka asoslangan jahon hamkorligini mustahkamladi.

“Ertangi kunimiz, dunyoning taqdiri va farovonligi o‘sib kelayotgan yosh avlod qo‘lida”, degan davlatimiz rahbarining so‘zlari barchamizning qalbimizdan joy oldi. Yoshlar ongiga tinchlik, do‘stlik, o‘zaro ishonch va hurmat g‘oyalarini singdirish – bugungi kunning eng muhim vazifalaridan biri hisoblanadi. Shu maqsadda “Jahon yoshlarining tinchlik sari harakati”ni ta’sis etish va uning qarorgohini yurtimizda joylashtirish taklifini ilgari surish O‘zbekistonning tinchlikparvar siyosatiga yorqin misoldir.

Bugun jamiyatimizda bag‘rikenglik siyosati izchil amalga oshirilmoqda. Shu bilan birga, islom ma’rifati g‘oyalarini chuqur o‘rganish va jahon hamjamiyatiga targ‘ib qilish bo‘yicha ishlar faol davom ettirilmoqda. Bu – milliy va umuminsoniy qadriyatlarni uyg‘unlashtirish yo‘lidagi muhim qadam.

“Yangi O‘zbekiston barcha davlatlar bilan o‘zaro hamjihatlik, ochiq muloqot va yaqin sheriklik tarafdoridir”, degan da’vat esa mamlakatimizning tashqi siyosati va insoniyat oldidagi mas’uliyatini yorqin ifoda etadi.

Biz, hududiy Kengash deputatlari ham, davlatimiz rahbari ilgari surgan ezgu g‘oyalarni hayotga tatbiq etishda, tinchlik va hamjihatlikni mustahkamlashda o‘z hissamizni qo‘shishga tayyormiz.