Янгиқўрғон туманида давлат хизматлари кўрсатиш сифати ўрганилди
24 талик тавсия ижроси ҳамда ҳафталик иш режаси доирасида Халқ депутатлари Наманган вилояти Кенгаши депутатлари М. Мақсудов ва Д. Хатамова, вилоят Кенгаши котибияти мудири Т. Гаппаров ҳамда масъуллардан иборат ишчи гуруҳ томонидан Янгиқўрғон тумани Давлат хизматлари маркази фаолияти ўрганилди.
Ўрганиш жараёнида фуқароларга давлат хизматларини кўрсатиш сифати, мурожаатларни қабул қилиш ва кўриб чиқиш тартиби, хизматлардан фойдаланиш учун яратилган шароитлар ҳамда аҳолига таъминланган қулайликларга алоҳида эътибор қаратилди.
Ташриф доирасида «Мадад» нодавлат нотижорат ташкилоти вакиллари билан ҳамкорликда фуқаролар қабули ташкил этилди. Қабулда мурожаат этган фуқароларга ҳуқуқий маслаҳатлар берилиб, амалий ёрдам кўрсатилди.
Шунингдек, «Мадад» ННТ билан ҳамкорликни изчил давом эттириш, аҳолига ҳуқуқий ёрдам кўрсатиш қамровини кенгайтириш ҳамда давлат хизматлари сифатини янада оширишга қаратилган қўшма тадбирларни амалга ошириш бўйича келишувга эришилди.