O‘zbekiston Respublikasi Prezidentining PQ–406-son qarori, Oliy Majlis Senati Kengashining KQ–35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya ijrosi doirasida hududlarda deputatlik nazorati tadbirlari davom ettirilmoqda.

Navbatdagi o‘rganish Xalq deputatlari Marg‘ilon shahar Kengashi kotibiyat mudiri A.Ermatov tomonidan 15-Zuhro saylov okrugi hududidagi “Zuhro” mahallasida o‘tkazildi.

O‘rganish davomida mahallada ijtimoiy xizmatlarning tashkil etilishi, aholining ijtimoiy ehtiyojmand qatlamlariga ko‘rsatilayotgan xizmatlar sifati, kam ta’minlangan oilalarga ijtimoiy nafaqa va moddiy yordamlarni tayinlash hamda to‘lash jarayonlari ko‘rib chiqildi.

Ma’lumotlarga ko‘ra, mahalladagi ijtimoiy reyestrga jami 128 ta oila kiritilgan. Shundan 39 tasi davlat ta’minotidagi, 77 tasi kambag‘al hamda 12 tasi kambag‘allik chegarasidagi oilalarni tashkil etadi.

O‘rganish davomida reyestrga kiritilgan ayrim oilalarning ijtimoiy holati va yashash sharoitlari bevosita xonadonlarga borilgan holda ham o‘rganildi.

Jumladan, “Zuhro” MFY, Zuhro ko‘chasi, 29-16-uyda yolg‘iz yashovchi Mahmudova Zamira Soliyenaga ijtimoiy assistent biriktirilgani, fuqaro tibbiy ko‘rikdan o‘tkazilgani hamda bepul dori-darmon bilan ta’minlangani aniqlandi.

Shuningdek, Zuhro ko‘chasi, 33-7-uyda yashovchi Ismayilova Nargiza Sadikjanovnaning oilaviy sharoiti ham o‘rganildi. Ikki nafar farzand tarbiyalayotgan oilaning katta farzandi Muhammadova Nazokatxon bolalikdan nogironligi bo‘lgan shaxs sifatida ijtimoiy reyestrga kiritilgan va oila davlat ta’minotida ekani ma’lum bo‘ldi.

Oiladagi ikkinchi farzand Boxodirov Muhammad Ayyubning bog‘cha to‘lovidan ozod etilgani, oila bolalar nafaqasini olayotgani qayd etildi. Shuningdek, oilaning mavjud ehtiyojidan kelib chiqib, “Saxovat va ko‘mak” jamg‘armasi hisobidan oziq-ovqat va kiyim-kechak xaridi uchun vaucher shakllantirib berilgan.

O‘rganish davomida ijtimoiy xizmatlarning aholiga yetib borishi, yordamlarning manzilliligi hamda ehtiyojmand oilalarning muammolarini joyida aniqlash masalalariga alohida e’tibor qaratildi.