Xalq deputatlari Toshkent shahar Kengashi deputati Sevara Fayziyeva “Shirinobod” mahalla fuqarolar yig‘ini raisi bilan birgalikda Yashnobod tumanidagi 2-son shahar klinik shifoxonasida bo‘lib, muassasada aholiga ko‘rsatilayotgan tibbiy xizmatlar va yaratilgan sharoitlarni o‘rgandi.

🔎 O‘rganish davomida bemorlarga davolash va reabilitatsiya yordamini ko‘rsatish jarayoni, shifoxonaning moddiy-texnik bazasi, tibbiy kadrlar bilan ta’minlanganligi, shuningdek, kuz-qish va isitish mavsumiga tayyorgarlik holatiga alohida e’tibor qaratildi. Shifoxona bosh shifokori U. Ro‘ziyev muassasa faoliyati va amalga oshirilayotgan ishlar haqida deputatlarga batafsil ma’lumot berdi.

🩺 2-son shahar klinik shifoxonasi 150 o‘ringa mo‘ljallangan bo‘lib, bu yerda terapiya, nevrologiya va kardiologiya bo‘limlari faoliyat yuritadi. Shuningdek, fizioterapiya bo‘limida bemorlarning tiklanishi va reabilitatsiyasi uchun zarur muolajalar amalga oshirilmoqda.

♨️ Sevara Fayziyeva shifoxonaning kuz-qish mavsumiga tayyorgarligiga ham alohida e’tibor qaratdi. Muassasada zamonaviy uskunalar bilan jihozlangan mahalliy qozonxona mavjud bo‘lib, u shifoxonani isitish va issiq suv bilan ta’minlaydi. Isitish mavsumida tizimning uzluksiz ishlashini ta’minlash bo‘yicha amalga oshirilgan tayyorgarlik ishlari ko‘zdan kechirildi.

🏗 O‘rganish jarayonida shifoxonaning 2026-yil uchun respublika investitsiya dasturiga kiritilgani ham qayd etildi. Dastur doirasida Sog‘liqni saqlash vazirligi mablag‘lari hisobidan laboratoriya binosini to‘liq rekonstruksiya qilish va zamonaviy laboratoriya uskunalari bilan jihozlash rejalashtirilgan. Mazkur loyiha diagnostik tekshiruvlarning sifati va tezkorligini yanada oshirishga xizmat qilishi kutilmoqda.

👨‍⚕️ Shifoxonaning tibbiy kadrlar bilan ta’minlanganligi ham o‘rganildi. Hozirda muassasa tibbiy mutaxassislar bilan to‘liq ta’minlangan bo‘lib, joriy yilning o‘zida Toshkent tibbiyot akademiyasining 3 nafar bitiruvchisi — 1 nafar kardiolog va 2 nafar nevrolog shifokor ishga qabul qilingan.

🛠 Bemorlar uchun munosib sharoit yaratish borasida amalga oshirilgan ishlar bilan ham tanishildi. Shifoxona uch yil davomida “Tashabbusli budjet” dasturlarida g‘olib bo‘lgan. Jalb qilingan mablag‘lar hisobidan fizioterapiya bo‘limida joriy ta’mirlash ishlari amalga oshirilib, oshxona xonalari belgilangan sanitariya talablariga muvofiqlashtirilgan.

💡 Mazkur o‘rganish mahalliy Kengash deputati faoliyatining eng muhim yo‘nalishlaridan biri — aholiga o‘z vaqtida va sifatli tibbiy yordam ko‘rsatilishi holatini bevosita joyiga chiqib o‘rganish bilan hamohangdir. Shu bilan birga, tibbiyot muassasasining kuz-qish mavsumiga tayyorgarligi, isitish va issiq suv ta’minoti, moddiy-texnik bazani mustahkamlash hamda investitsiya loyihalarining ahamiyatiga e’tibor qaratildi.

🤝 Xalq deputatlari Toshkent shahar Kengashi deputati Sevara Fayziyeva aholi salomatligini muhofaza qilish, tibbiy xizmatlar sifati va qulayligini oshirish, shuningdek, bemorlar uchun yaratilayotgan sharoitlarni joyiga chiqib o‘rganish deputatlik faoliyatining muhim yo‘nalishlaridan ekanini qayd etdi.

✅ O‘rganish yakunida shifoxonada davolash va reabilitatsiya xizmatlarini yanada takomillashtirish, mavjud imkoniyatlardan samarali foydalanish hamda tibbiy xizmat sifatini izchil oshirib borish muhimligi ta’kidlandi.