Mustaqilligimizning 35 yilligi arafasida “Mehr va saxovat” oyligi doirasida mahallalarda aholi bilan bevosita muloqot qilish, ijtimoiy himoyaga muhtoj oilalarning holidan xabar olish hamda ularni qiynayotgan masalalarni joyida o‘rganishga qaratilgan ishlar davom etmoqda.

📝 Shu doirada Xalq deputatlari Toshkent shahar Kengashi deputati Sevara Fayziyeva boshchiligida Yashnobod tumanidagi “Uysozlar” mahallasida uyma-uy o‘rganish ishlari olib borildi. Unda Xalq deputatlari Toshkent shahar Kengashi Muzaffar Yusubov, O‘zbekiston Ekologik partiyasi Yashnobod tuman partiya tashkiloti raisi Dildora Mavlyanova, Yashnobod tuman Kengashi kotibiyati mudiri Alisher Kerimov, tuman Kengashi deputati Ibrohim Rasulov hamda mahalla yettiligi vakillari ishtirok etdi.

🔺 O‘rganish davomida fuqarolarning yashash sharoitlari, ijtimoiy ehtiyojlari, kuz-qish mavsumiga tayyorgarlik holati hamda kommunal xizmatlar bilan bog‘liq murojaatlariga alohida e’tibor qaratildi. Bu jarayon Mahalliy Kengash deputati faoliyatining eng muhim yo‘nalishlari bo‘yicha tavsiyalar, xususan, ijtimoiy ehtiyojmand oilalarni qo‘llab-quvvatlash, boshqaruv kompaniyalari faoliyati va kuz-qish mavsumida isitish tizimining holatini o‘rganish vazifalari bilan uyg‘un holda olib borildi.

♨️ Xususan, ijtimoiy himoyaga muhtoj oilalardan birining xonadoniga tashrif davomida fuqaro qish mavsumida isitish tizimi bilan bog‘liq muammo mavjudligini bildirdi. Deputat Sevara Fayziyeva mazkur murojaatni joyida o‘rganib, hududga xizmat ko‘rsatuvchi boshqaruv servis kompaniyasi rahbari bilan bog‘landi hamda muammoni bartaraf etish bo‘yicha amaliy choralar muhokama qilindi.

⚙️ Natijada xonadondagi isitish tizimini yangilash uchun zarur sharoit yaratilib, BSK vakillari tomonidan tizimni o‘rnatib berish masalasi hal etildi. Shu tariqa fuqaroning kuz-qish mavsumini munosib sharoitda o‘tkazishi uchun zarur amaliy choralar belgilandi.

💬 Shuningdek, uyma-uy muloqotlar davomida fuqarolarning boshqa murojaat va takliflari ham tinglanib, ularni tegishli mutasaddi tashkilotlar bilan hamkorlikda hal etish bo‘yicha vazifalar belgilab olindi. Ko‘tarilgan masalalarning ijrosi deputatlik nazoratiga olindi.

🌱 Sevara Fayziyeva mahallalarda olib borilayotgan bunday manzilli o‘rganishlarning asosiy maqsadi fuqarolarning murojaatlarini bevosita yashash joyida eshitish, ayniqsa, e’tibor va ko‘makka muhtoj oilalarning ehtiyojlarini aniqlash hamda mavjud imkoniyatlardan kelib chiqib amaliy yechim topishdan iborat ekanini ta’kidladi.

💡 Mustaqilligimizning 35 yilligi arafasida amalga oshirilayotgan mazkur ishlar inson qadrini ulug‘lash, mehr-oqibat va hamjihatlik muhitini mustahkamlash bilan birga, aholi muammolarini manzilli hal etishda deputatlik va jamoatchilik nazoratining samaradorligini oshirishga xizmat qilmoqda.