#deputatlik_faoliyati

Yangiobod MFYda aholini ichimlik suvi bilan ta’minlash masalasi deputatlik nazoratiga olindi

Xalq deputatlari Toshkent viloyati Kengashi 60-Qoraxitoy saylov okrugidan saylangan Sainuridinov Saidmuxtor Saidg‘afforovichga biriktirilgan kotibiyat xodimi O‘. Abduqodirov tomonidan Yangiobod MFY hududida aholini ichimlik suvi bilan ta’minlash masalasi o‘rganildi.

Ohangaron tumani Quyun MFY hududida 2015 yilda qurilgan namunaviy uy-joylarga xizmat ko‘rsatuvchi ichimlik suvi nasos stansiyasidan Yangiobod, Bahor, Gulzor va Navro‘z ko‘chalari aholisi tomonidan o‘z mablag‘lari hisobidan tortilgan ichimlik suvi tarmoqlari va suv inshootlarini «Olmaliq shahar suv ta’minoti» AJ balansiga o‘tkazishda fuqarolar tomonidan murojaat kelib tushdi.

O‘rganish jarayonida, mavjud ichimlik suvi tarmoqlari va inshootlar holati joyiga chiqqan holda o‘rganildi va aholi tomonidan o‘z mablag‘lari hisobidan qurilgan ichimlik suvi tarmoqlari, nasos uskunasi va suv inshootlarining holati ko‘zdan kechirildi.

Jumladan, D-160 mm — 700 metr va D-110 mm — 1900 metr uzunlikdagi ichimlik suvi quvurlari, GDF 80/200 rusumli, 22 kVt quvvatga ega suv nasosi, suv inshooti hamda suv minorasi mavjudligi aniqlandi.

Natijada, aholi murojaatida ko‘tarilgan masalani ijobiy hal etish, mavjud ichimlik suvi tarmoqlari va inshootlarini belgilangan tartibda «Olmaliq shahar suv ta’minoti» AJ balansiga o‘tkazish yuzasidan Toshkent viloyati deputati tomonidan deputatlik so‘rovi yuborilishi belgilandi.

Aholini sifatli va barqaror ichimlik suvi bilan ta’minlash, fuqarolar murojaatlarida ko‘tarilgan masalalarni o‘rganish hamda ularning qonuniy manfaatlarini ta’minlash borasidagi deputatlik nazorati izchil davom ettiriladi.

📱 Telegram 📱 Instagram 📱 Facebook