⚖️ ДЕПУТАТЛИК СЎРОВИ АСОСИДА АҲОЛИ МУРОЖААТИГА АМАЛИЙ ЕЧИМ ТОПИЛДИ
Халқ депутатлари Наманган туман Кенгаши депутати Умиджон Солиев томонидан сайлов округида ўтказилган учрашувлар ва аҳоли қабули давомида фуқаролар томонидан билдирилган мурожаатлар атрофлича ўрганилиб, уларни ижобий ҳал этиш юзасидан тегишли чоралар кўрилмоқда.
Жумладан, Наманган тумани “Чорбоғ” маҳалла фуқаролар йиғинининг “Тараққиёт” кўчасида пиёдалар ҳаракати учун белгиланган йўлак мавжуд бўлса-да, ушбу ҳудудда пиёдалар ўтиш жойини билдирувчи йўл белгиси (знак) ўрнатилмагани сабабли автотранспорт ҳаракатида иштирок этувчилар ва пиёдалар учун маълум ноқулайликлар ҳамда хавфли вазиятлар юзага келаётгани аҳоли томонидан асосли равишда кўтарилди.
Мазкур муаммони бартараф этиш мақсадида депутат У. Солиев томонидан амалдаги қонунчилик талаблари асосида туман Йўллардан фойдаланиш унитар корхонасига депутатлик сўрови юборилди.
Депутатлик сўрови тегишли ташкилот томонидан қисқа муддатда кўриб чиқилиб, ҳудуд ўрганилди ҳамда мурожаатда келтирилган ҳолат ўз тасдиғини топди. Натижада “Тараққиёт” кўчасида пиёдалар ўтиш жойини билдирувчи йўл белгиси ўрнатилиб, ҳаракат хавфсизлигини таъминлаш бўйича амалий ишлар бажарилди.
Мазкур амалий ечим маҳалла аҳолиси, айниқса мактаб ўқувчилари, кекса ёшдагилар ва пиёдаларнинг хавфсиз ҳаракатланиши учун қулай шароит яратишга хизмат қилди. Бу эса депутатлик назоратининг аҳоли манфаатларини таъминлаш, мурожаатларга тезкор муносабат билдириш ва жойлардаги долзарб масалаларни ҳал этишдаги самарали ўрнини яна бир бор намоён этди.
Халқ депутатлари Наманган туман Кенгаши томонидан аҳоли мурожаатларини ўрганиш, депутатлик назоратини кучайтириш ва ҳар бир муаммони амалий ечимга айлантириш борасидаги ишлар изчил давом эттирилади.