"Awır rayonlar hám máhálleni kompleksli rawajlandırıw" baǵdarlaması sheńberinde Bozataw rayonında ámelge asırılıp atırǵan keń kólemli jumıslardı keń jámiechilikke jetkeriw, sonday-aq, rayon nuranıyları hám kekselerdi jaratılıp atırǵan sharayatlar menen jaqınnan tanıstırıw maqsetinde media-tur shólkemlestirildi. 

Media-tur dawamında Xalıq deputatları Bozataw rayonlıq Keńesi deputatları Sh. Berdaxov hám J.Jumanazarov "Qusxanataw" awıl puqaralar jıyını aymaǵında bolıp, bul jerde "Jańa Ózbekstan" kórinisindegi zamanagóy máhálle qurıw baǵdarında alıp barılıp atırǵan jumıslardı kózden ótkerdi. 

Ilaj dawamında aymaqtaǵı qurılıs hám abadanlastırıw jumısları, xalıq ushın jaratılıp atırǵan qolaylı sharayatlar, sonıń menen birge ámelge asırılıp atırǵan sociallıq hám infrastrukturalıq joybarlar haqqında maǵlıwmatlar berildi. 

Deputatlar aymaqtaǵı ózgerisler xalıqtıń turmıs sapasın jaqsılawǵa, qolaylı hám zamanagóy jasaw sharayatların jaratıwǵa baǵdarlanǵanın atap ótti. Media-tur dawamında rayon rawajlanıwındaǵı unamlı ózgerislerdi jámiyetshilikke keńnen jetkeriw hám xalıq penen ashıq baylanıstı jáne de bekkemlewge ayrıqsha itibar qaratıldı. 

Bunnan soń media-tur qatnasıwshıları Ózbekstan Respublikası Prezidentiniń 2026-jıl 5-fevraldaǵı PQ-49-sanlı hám 21-fevraldaǵı PQ-70-sanlı qararları, sonday-aq Qaraqalpaqstan Respublikası Joqarǵı Keńesi Prezidiumınıń 2026-jıl 6-marttaǵı 617-sanlı qararı tiykarında Bozataw rayonında aymaqlardı kompleksli rawajlandırıw, isbilermenlikti qollap-quwatlaw hám xalıq ushın jańa imkaniyatlar jaratıw baǵdarında ámelge asırılıp atırǵan jumıslar menen tanıstı. 

Sonday-aq, “Erkindárya” APJ aymaǵında “Jańa Ózbekstan” kórinisindegi zamanagóy máhállege aylandırıw baǵdarında alıp barılıp atırǵan dóretiwshilik, abadanlastırıw hám infratuzilmanı rawajlandırıw jumısları jaqınnan kózden ótkerildi. 

Aymaqta xalıqtıń bos waqtın mazmunlı ótkeriwine, jaslar hám kekseler ushın qolaylı dem alıw hám seyil etiw orınların jaratıwǵa ayrıqsha itibar qaratılmaqta. 

Sonıń menen birge, jaslardıń sport penen turaqlı shuǵıllanıwın qollap-quwatlaw, salamat turmıs tárizin qáliplestiriw maqsetinde WORKOUT sport maydanshasın qurıw boyınsha alıp barılıp atırǵan jumıslar da kózden ótkerildi. Bul sıyaqlı joybarlar aymaqtıń kórkin jaqsılaw menen birge, xalıq ushın qolaylı dem alıw, sport penen shuǵıllanıw hám bos waqıttı mazmunlı ótkeriw ushın jańa múmkinshilikler jaratıwǵa xızmet etedi.