Xalq deputatlari Bo‘stonliq tumani Kengashning 2026-yilga mo‘ljallangan ish rejasiga muvofiq O‘zbekiston Liberal demokratik partiyasidan saylangan deputat B.Azmetov tomonidan tumanning “Markaziy” va “Navro‘z” mahallalarida piyodalar xavfsizligini ta’minlash, yo‘l harakati qatnashchilari uchun zarur shart-sharoitlar yaratish hamda piyodalar yo‘laklarining svetoforlar, yo‘l belgilari va yo‘l chiziqlari bilan jihozlanish holati o‘rganildi.

🔺O‘rganish jarayonida, avvalo, piyodalarning yo‘lni xavfsiz kesib o‘tishi uchun yaratilgan sharoitlar, yo‘l infratuzilmasi ob’ektlarining texnik holati va ularning belgilangan talablarga muvofiqligiga alohida e’tibor qaratildi. Aniqlanishicha, hududdagi piyodalar harakati serqatnov bo‘lgan yo‘l va chorrahalarda tegishli yo‘l belgilari o‘rnatilgan bo‘lib, ular haydovchilar va piyodalar uchun zarur axborotlarni yetkazib berishga xizmat qilmoqda.

🔺Shuningdek, o‘rganilgan hududdagi svetoforlar soz holatda ekanligi, ular belgilangan tartibda ishlab, yo‘l harakatini tartibga solishga xizmat qilayotgani kuzatildi. Svetoforlarning soz ishlashi, ayniqsa, harakat jadalligi yuqori bo‘lgan hududlarda piyodalar xavfsizligini ta’minlashda muhim ahamiyat kasb etadi.

🔺Biroq, o‘rganish davomida ayrim kamchiliklar ham aniqlandi. Jumladan, yo‘l chiziqlarining eskirib qolgani va ayrim joylarda ularning ko‘rinishi sezilarli darajada pasaygani ma’lum bo‘ldi. Bu holat, ayniqsa, tungi vaqtda va noqulay ob-havo sharoitlarida haydovchilar hamda piyodalar uchun qo‘shimcha qiyinchiliklar tug‘dirishi, piyodalar o‘tish joylarining aniq ko‘rinishini ta’minlashga salbiy ta’sir ko‘rsatishi mumkin.

🔺Deputat tomonidan piyodalar xavfsizligini ta’minlash borasidagi ishlarga alohida e’tibor qaratilib, mavjud kamchiliklarni bartaraf etish, yo‘l infratuzilmasi obyektlarining sozligi va ko‘rinishini ta’minlash, shuningdek, harakat xavfsizligi bilan bog‘liq holatlarni muntazam nazorat qilish bo‘yicha mas’ullarga murojaat qilinishi belgilandi.