O‘zbekiston Respublikasi Prezidentining PQ–406-son qarori, Oliy Majlis Senati Kengashining KQ–35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya ijrosi doirasida Marg‘ilon shahrida deputatlik nazorati tadbirlari izchil davom ettirilmoqda.

Navbatdagi o‘rganish Yoshlar xiyobonining bugungi holati, hududdagi yashil maydonlar va manzarali daraxtlarning saqlanishi hamda parvarishlanishiga qaratildi.

Xalq deputatlari Marg‘ilon shahar Kengashi kotibiyat mudiri A. Ermatov va deputat M. Abdurahmonovaga biriktirilgan tashkilot — Ekologiya, atrof-muhitni muhofaza qilish va iqlim o‘zgarishi sohasidagi nazorat bo‘yicha Marg‘ilon shahar bo‘limi bilan hamkorlikda joyiga chiqib o‘rganish ishlari olib borildi.

Shuningdek, deputat M. Abdurahmonovaga biriktirilgan qonun — O‘zbekiston Respublikasining 2016-yil 21-sentabrdagi O‘RQ-409-son «O‘simlik dunyosini muhofaza qilish va undan foydalanish to‘g‘risida»gi Qonuni ijrosi ham o‘rganishning asosiy yo‘nalishlaridan biri bo‘ldi.

O‘rganish davomida xiyobondagi daraxt va butalarning holati, ularni parvarishlash ishlari, yashil hududlarning saqlanishi hamda o‘simlik dunyosini muhofaza qilish bo‘yicha belgilangan talablarning bajarilishi ko‘zdan kechirildi.

Joyiga chiqib o‘rganish jarayonida ayrim manzarali daraxtlarning qurib qolgani ham aniqlandi. Mazkur holat yuzasidan daraxtlarning qurishiga sabab bo‘lgan omillarni aniqlash, ularni tegishli tartibda hisobga olish hamda xiyobondagi yashil hududlarni parvarishlash ishlarini kuchaytirish zarurligi qayd etildi.

O‘RQ-409-son Qonunda o‘simlik dunyosini muhofaza qilish, undan oqilona foydalanish, shuningdek, o‘simliklarning yashash faoliyati uchun qulay sharoitlarni ta’minlashga qaratilgan talablar belgilangan. Qonunga ko‘ra, o‘simlik dunyosi umummilliy boylik hisoblanib, davlat tomonidan muhofaza qilinadi.

Shu bois, Yoshlar xiyobonidagi mavjud yashil hududlarni asrash, manzarali daraxtlarni muntazam parvarishlash, qurigan daraxtlar holatini o‘rganish va kelgusida bunday holatlarning oldini olish muhim vazifalardan biri ekani ta’kidlandi.

O‘rganish yakunlari bo‘yicha aniqlangan kamchiliklarni bartaraf etish, xiyobondagi yashil hududlarni saqlash va obodonlashtirish ishlarini kuchaytirish yuzasidan tegishli tavsiyalar berildi.

Deputatlik nazorati doirasidagi mazkur o‘rganish O‘RQ-409-son Qonun talablarining joylarda amaliy ijrosini ta’minlash, yashil hududlarni asrash va ekologik muhitni yanada yaxshilashga qaratilgani bilan ahamiyatlidir.