O‘zbekiston Respublikasi Prezidentining PQ-406-son qarori hamda Oliy Majlis Senati Kengashining KQ-35-V-son qarori ijrosini ta’minlash, shuningdek, mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya asosida Xalq deputatlari Marg‘ilon shahar Kengashining ish rejasiga muvofiq hududlarda o‘rganish ishlari olib borilmoqda.

Shu doirada 15-Zuhro saylov okrugi deputati, Kengash kotibiyati mudiri A. Ermatov tomonidan Zuhro mahallasida hududdagi ijtimoiy infratuzilma obyektlari, xususan, sport inshootlarida amalga oshirilayotgan ishlarning holati o‘rganildi.

O‘rganish davomida hududdagi “Mehnat” stadionida olib borilayotgan qurilish va rekonstruksiya ishlari alohida e’tibor markazida bo‘ldi. Bugungi kunda stadionda keng ko‘lamli bunyodkorlik ishlari amalga oshirilib, sport inshooti zamonaviy qiyofa kasb etmoqda.

Mazkur qurilish va rekonstruksiya ishlari “Shams 72” MChJ tomonidan amalga oshirilayotgani qayd etildi. Ishlarning sifatli va belgilangan talablar asosida bajarilishi, yaratilayotgan infratuzilmaning aholiga, ayniqsa, yoshlar uchun qulay va xavfsiz bo‘lishi masalalariga deputatlik nazorati doirasida e’tibor qaratildi.

Yangilanayotgan “Mehnat” stadioni kelgusida mahalla aholisi, xususan, yoshlarning sport bilan muntazam shug‘ullanishlari, bo‘sh vaqtlarini mazmunli o‘tkazishlari va sog‘lom turmush tarziga amal qilishlari uchun muhim maskanga aylanishi kutilmoqda.

Ta’kidlash joizki, zamonaviy sport infratuzilmasining barpo etilishi yoshlarning jismoniy faolligini oshirish, ularni sportga keng jalb etish hamda sog‘lom avlodni tarbiyalashda muhim omillardan biridir.

Mazkur masala Xalq deputatlari Marg‘ilon shahar Kengashining navbatdagi o‘ttiz birinchi sessiyasiga kiritilgan masalalardan biri sifatida deputatlik nazorati doirasida o‘rganildi. O‘rganish jarayonida stadionda olib borilayotgan qurilish va rekonstruksiya ishlarining borishi, obyektning zamonaviy talablarga mosligi hamda aholiga yaratilayotgan sharoitlarning sifati e’tibor markazida bo‘ldi.

Umuman, Zuhro mahallasida olib borilayotgan mazkur o‘rganishlar hududdagi ijtimoiy infratuzilmani rivojlantirish, aholining, ayniqsa, yoshlarning sport bilan shug‘ullanishi uchun munosib sharoitlar yaratish hamda amalga oshirilayotgan ishlarning samaradorligini ta’minlashga qaratilgan deputatlik nazoratining amaliy ifodasidir.

Aniqlangan masalalar va qurilish ishlarining yakuniy natijalari deputatlik nazoratida bo‘lib, obyektning belgilangan talablar asosida foydalanishga topshirilishi kuzatib boriladi.