Xalq deputatlari Ishtixon tumani Kengashi deputati Gulmira Karimovna Safarova tomonidan 2026-yil 27-iyuldagi 181-ds-369-26-sonli deputat so‘rovi orqali tumanda boquvchisi bo‘lmagan ehtiyojmand xotin-qizlarni qo‘llab-quvvatlash bo‘yicha belgilangan vazifalar ijrosi yuzasidan ma’lumot so‘ralgan edi.

Mazkur deputat so‘rovi Xalq deputatlari Ishtixon tumani Kengashining 2026-yil 19-fevraldagi VII-19-17-795-K/26-sonli qarori bilan tasdiqlangan 2026-yilda tumanni kompleks ijtimoiy-iqtisodiy rivojlantirish dasturida belgilangan 683 nafar boquvchisi bo‘lmagan ehtiyojmand xotin-qizlarni qo‘llab-quvvatlash vazifasi ijrosi doirasida yuborilgan.

📄 So‘rovga “Inson” ijtimoiy xizmatlar markazi tomonidan 2026-yil 5-avgustdagi 09-05/01-1396-sonli javob xati taqdim etildi.
Javob xatida keltirilishicha, bugungi kunda Ishtixon tumanida 421 nafar xotin-qizga boquvchisini yo‘qotganlik nafaqasi tayinlangan va mazkur nafaqalar to‘lab kelinmoqda.

Shuningdek, ushbu xotin-qizlarning “Ijtimoiy himoya yagona reyestri”da mavjudlariga Ijtimoiy himoya milliy agentligi tomonidan moddiy yordam va boshqa turdagi ijtimoiy ko‘maklar ko‘rsatib kelinayotgani ma’lum qilingan.

📌 Shu bilan birga, javob xatida deputat so‘rovida ko‘rsatilgan 683 nafar xotin-qiz bo‘yicha aniq ma’lumotlar mavjud emasligi sababli, ularga ko‘rsatilgan yordamlar yuzasidan to‘liq ma’lumot taqdim etish imkoniyati mavjud emasligi qayd etilgan.

Mazkur javob deputat tomonidan o‘rganilib, belgilangan vazifalar ijrosi, ehtiyojmand xotin-qizlarni ijtimoiy qo‘llab-quvvatlash holati hamda mavjud muammolar yuzasidan deputatlik nazorati davom ettiriladi.
Xalq deputatlari Ishtixon tumani Kengashi tomonidan aholining ijtimoiy himoyaga muhtoj qatlamlarini qo‘llab-quvvatlash, belgilangan dasturlar ijrosini o‘rganish va aniqlangan masalalarni mas’ul tashkilotlar oldiga qo‘yish borasidagi ishlar izchil davom ettiriladi.

Bizni ijtimoiy tarmoqlarda kuzating:
Telegramm | Web-sayt | Facebook | Instagram