Xalq deputatlari Bo‘stonliq tumani Kengashning 2026-yilga mo‘ljallangan ish rejasiga muvofiq Kengash raisi O.Babayev, kotibiyat mudiri J.Sadirov va kotibiyat xodimi N.Kurganova tomonlaridan tumanning “S.Raximov” mahallasining ayrim ko‘chalarida chiqindilarni olib chiqib ketish xizmati holati o‘rganildi.

🟢O‘rganish davomida mahallaning asosiy ko‘chalari bilan bir qatorda chekka hududlarida mavjud holat ko‘zdan kechirilib, ayrim ko‘chalarda chiqindilarning belgilanmagan joylarga tashlangani, xonadonlar oldida esa turli maishiy va qurilish chiqindilari to‘planib qolgani aniqlandi.

🟢Ayniqsa, chekka ko‘chalarda chiqindilarni o‘z vaqtida olib chiqib ketish masalasi aholi uchun dolzarb ekani ma’lum bo‘ldi. To‘planib qolgan chiqindilar nafaqat hududning tashqi ko‘rinishiga salbiy ta’sir ko‘rsatmoqda, balki sanitariya-gigiyena talablariga rioya etilishi va atrof-muhit tozaligiga ham ta’sir ko‘rsatishi mumkin.

🟢Shu munosabat bilan deputat tomonidan chiqindi tashish xizmatini ko‘rsatuvchi “Rahnamo Servis” MChJ mas’ul vakiliga aniqlangan kamchiliklarni bartaraf etish, maxsus avtotransport vositalarining belgilangan grafik asosida harakatlanishini ta’minlash, xonadonlar oldida to‘planib qolgan maishiy chiqindilarni zudlik bilan olib chiqib ketish hamda xizmat ko‘rsatish sifati ustidan nazoratni kuchaytirish yuzasidan tavsiyalar berildi.

🟢Shuningdek, qurilish va boshqa turdagi chiqindilarni tozalash va olib chiqib ketish bo‘yicha tuman Obodonlashtirish boshqarmasiga tegishli ko‘rsatma berish va chiqindilarni belgilanmagan joylarga tashlamaslik, qurilish va yirik hajmdagi chiqindilarni maxsus tartibda chiqarishni yo‘lga qo‘yish bo‘yicha aholi o‘rtasida tushuntirish ishlarini olib borish belgilandi.