Xalq deputatlari viloyat va tuman Kengashlari deputati, Kotibiyat mudiri Iftixorjon Jo‘raev Abdumuxtorovich hamda Elchieva Nafisaxon Tohirovna “Yuksalish” umummilliy harakati Farg‘ona viloyati hududiy bo‘linmasi rahbari bilan birgalikda Furqat tumani Istiqlol MFY hududida amalga oshirilayotgan istiqbolli loyihalar bilan joyiga chiqqan holda tanishdi.

O‘rganish ishlari tegishli ishchi guruh va mas’ul mutasaddilar ishtirokida maxsus savolnoma asosida, har bir yo‘nalish bo‘yicha savolma-savol tahlil qilish tartibida olib borildi.

Jarayonda, avvalo, loyihalarning belgilangan maqsad va vazifalarga muvofiq amalga oshirilayotgani, qurilish-montaj ishlarining sifati, foydalanilayotgan qurilish materiallarining talablarga javob berishi, ishlarning belgilangan grafik asosida bajarilishi, mablag‘larning maqsadli sarflanishi hamda ob’ektlar foydalanishga topshirilganidan keyin aholi va hudud uchun qanday amaliy samara berishi kabi masalalarga alohida e’tibor qaratildi.

Shuningdek, loyihalarning muhandislik-kommunikatsiya tarmoqlari bilan uzviy bog‘liqligi, suv, kanalizatsiya va boshqa infratuzilma ob’ektlarining holati ham ko‘zdan kechirildi.

O‘rganish davomida aniqlangan holatlar mas’ullar bilan birgalikda muhokama qilinib, mavjud kamchiliklarni bartaraf etish bo‘yicha amaliy choralar belgilab olindi.

Mazkur o‘rganishdan asosiy maqsad — loyihalarning qog‘ozdagi ko‘rsatkichlarini emas, balki ularning joyidagi haqiqiy holati, bajarilayotgan ishlar sifati va aholi uchun kutilayotgan natijadorligini baholashdan iborat bo‘ldi.