Сессияда дастлаб вилоят аҳолиси ва ижтимоий соҳа объектларини 2023 йилда энергия ресурслари билан барқарор таъминлаш чора-тадбирлари юзасидан амалга оширилган ишлар тўғрисида вилоят ҳокимининг биринчи ўринбосари Жамшид Турсуновнинг ҳисоботи тингланди.  

Шунингдек, сессия ишида Жамшид Турсунов вилоятда хизматлар соҳасини ривожлантириш бўйича амалга оширилаётган ишларнинг натижадорлиги тўғрисида ҳам тўхталди.  

Таъкидланишича, вилоятда хизматлар соҳасининг мамлакатимиз иқтисодиётидаги улушини кўпайтириш, хизматлар турларини кенгайтириш ва сифатини ошириш бўйича ўз ечимини кутаётган муаммоли масалаларни ҳал қилиш, жойларда хизматлар соҳасидаги мавжуд имкониятларни тўлиқ ишга солиш, мазкур йўналишда тадбиркорлик субъектларини янада қўллаб-қувватлаш, уларнинг ғоя ва ташаббусларини рағбатлантириш борасида муайян ишлар амалга оширилмоқда. Жорий йил 1-чорак якунига кўра вилоятда хизмат кўрсатиш ҳажми 4,2 трлн.сўм ёки ўсиш суръати 109,9 фоизни ташкил этиб, аҳоли жон бошига хизматлар ҳажми 2022 йил 1-чоракдаги 1,7 млн.сўмдан, 2,1 млн.сўмга етган. Ялпи ҳудудий маҳсулот таркибида хизмат кўрсатиш соҳасининг улуши 41,5 фоизни ташкил этди. Тармоқлар бўйича, молиявий хизматлар (128,1%) ҳамда  алоқа ва ахборотлаштириш хизматларида (123,8%) юқори ўсиш суръатлари қайд этилди. Жорий йилнинг биринчи чорагида вилоятда 1031 та янги хизмат кўрсатиш корхоналари ташкил этилди. Жумладан, 500 та савдо, 236 та ташиш ва сақлаш, 96 та яшаш ва овқатланиш, 47 та ахборот ва алоқа, 21 та соғлиқни сақлаш, 131 та бошқа хизмат турлари бўйича объектлар ташкил этилди. Ҳудудий инвестиция дастурлари доирасида умумий қиймати 103,8 млрд.сўм бўлган 55 та хизмат кўрсатиш лойиҳаларини ишга тушириш орқали 283 та доимий ва мавсумий иш ўрни яратилди.  

Вилоятда тижорат банклари томонидан оилавий тадбиркорлик дастурлари доирасида 1 апрель ҳолатида 8303 та тадбиркорга 162,9 млрд.сўм имтиёзли кредит маблағлари ажратилган бўлса, шундан, хизмат кўрсатиш йўналишида 3038 та тадбиркорга 83,9 млрд.сўм маблағ ажратилган.

Шундан сўнг депутатлар ижтимоий, ишлаб чиқариш ҳамда маҳаллалар инфратузилмасини ривожлантириш дастури ва бошқа дастурлар доирасида вилоятда амалга оширилаётган қурилиш-таъмирлаш ишларининг ҳолати тўғрисида вилоят ҳокимининг қурилиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари Нарзулло Ҳамдамовнинг ҳисоботини тингладилар.   

Ҳисоботда таъкидланганидек, Ўзбекистон Республикаси Президенти Ш.Мирзиёев раҳбарлигида 2023 йил 11 апрель куни ёшлар сиёсати соҳасидаги ишлар натижадорлигини ошириш бўйича ўтказилган видеоселектор йиғилишида 14-30 ёшдаги ёшлар ўртасида хатлов ўтказиш ҳамда хатлов натижасида кўмакка муҳтож (“аҳволи оғир”) тоифага киритилган ёшларни вилоят, туман ва шаҳар ҳокимлари, уларнинг ўринбосарлари, сектор раҳбарлари, ташкилот ва муассасалар раҳбарларига номма-ном бириктириш белгиланган.

Шундан келиб чиқиб, “Ёшлар баланси” асосида вилоятдаги 544 та маҳалла фуқаролар йиғинида истиқомат қилувчи 14-30 ёшдаги 472 минг 573 нафар ёшлар таҳлил қилиниб, 3 та тоифага ажратиб олинди. Хусусан, давлат ва хусусий сектор ҳамда таълимда банд бўлган 270 минг 254 нафар (57,2 фоиз) ёшлар “яшил” тоифага; ишсиз, норасмий банд ва вақтинча меҳнат қобилиятига эга бўлмаган ижтимоий муаммолари мавжуд 202 минг 319 нафар (42,8 фоиз) ёшлар “сариқ” тоифага; тарбияси оғир ва алоҳида ишлашга муҳтож 14 140 нафар ёшлар “оғир” тоифага ажратилди. 

Сессияда халқ депутатлари вилоят Кенгаши ваколатига кирувчи бошқа масалалар ҳам кўриб чиқилди. Сессия кун тартибидаги масалалар юзасидан депутатларнинг ҳам фикр-мулоҳазалари ва таклифлари эшитилди. Кўриб чиқилган масалалар юзасидан халқ депутатлари вилоят Кенгашининг тегишли қарорлари қабул қилинди.