Xalq deputatlari Tuproqqal’a tuman Kengashining “Korrupsiyaga qarshi kurashish va xavfsizlik masalalari bo‘yicha doimiy komissiya” yig‘ilishida O‘zbekiston Respublikasi Prezidentining 2023-yil 31-maydagi 81-sonli farmoni ijrosi hamda “Yashil makon” umummilliy dasturi doirasida tumanda amalga oshirilgan ishlar yuzasidan tuman Ekologiya va atrof-muhitni muhofaza qilish inspeksiyasi rahbarining 2026-yil 1-chorakdagi axboroti ko‘rib chiqildi.

Ma’lumotlarga ko‘ra, 2026-yil bahor mavsumida tumanda 512 mingdan ortiq mevali va manzarali daraxt ko‘chatlari ekilgan bo‘lib, ularni sug‘orish va agrotexnik parvarishlash ishlari muntazam nazoratga olingan. Shuningdek, yashil jamoat parklari, bog‘lar hamda hokimlik bog‘ini tashkil etish uchun 16,8 gektar yer maydonida ko‘chatlar ekilib, parvarish ishlari olib borilmoqda.

Hisobot davrida atmosfera havosi, yer va suv resurslarini muhofaza qilish, chiqindilarni boshqarish hamda ekologik qonunbuzilishlarning oldini olish maqsadida 82 ta reyd tadbirlari o‘tkazilib, 56 ta holatda qonunbuzarlik aniqlangan va belgilangan tartibda choralar ko‘rilgan.

Doimiy komissiya tomonidan amalga oshirilgan ishlar tumanda ekologik barqarorlikni ta’minlash, yashil hududlarni kengaytirish hamda aholi uchun sog‘lom va qulay muhit yaratishga xizmat qilayotgani alohida ta’kidlandi.