Sayyor qabulda fuqarolar murojaatlariga aniq chora-tadbirlar belgilandi

Bugungi kunda davlat boshqaruvida aholining dardini eshitish, ularning murojaatlariga o‘z vaqtida va adolatli yechim topish ustuvor vazifalardan biri hisoblanadi. Chunki xalq bilan bevosita muloqot qilish, joylarda mavjud muammolarni ochiq muhokama etish orqali boshqaruv tizimining samaradorligi oshadi, fuqarolarning davlatga bo‘lgan ishonchi mustahkamlanadi. Shu bois aholi murojaatlarini tinglash va ularni hal etish masalasi ijtimoiy adolat hamda ochiq siyosatning muhim mezoniga aylangan. 

Xalq deputatlari Namangan shahar Kengashi kotibiyati mudiri, deputat N. Ubaydullayev tomonidan navbatdagi sayyor qabul o‘tkazildi. Mazkur qabul jarayoni fuqarolarning murojaatlarini joyida o‘rganish va amaliy yechim topish maqsadida tashkil etildi.

Qabul davomida fuqarolar, tashkilot rahbarlari, kotibiyat xodimlari A.Nurmatov, M. Abdulmajidov hamda deputatlar B. Xalilov, O. Yusupov va A. Nishanov ishtirok etdilar. Fuqarolar tomonidan bildirilgan murojaatlar batafsil tinglanib, har bir masala yuzasidan tegishli tushuntirish va yo‘nalishlar berildi. 

Murojaatlarni o‘rganish jarayonida bir qator masalalar joyida ijobiy hal etildi. Qolgan murojaatlar esa belgilangan tartibda ko‘rib chiqish, huquqiy baho berish hamda amaliy yechim ishlab chiqish uchun mas’ul tashkilot va mutasaddilarga yo‘naltirildi.

Sayyor qabul davomida fuqarolar muammolarini tizimli hal etish, ularni ortiqcha murojaatlarsiz tezkor ko‘rib chiqish bo‘yicha aniq chora-tadbirlar belgilandi.

Shuningdek, aholi bilan ochiq muloqotni kuchaytirish, joylardagi muammolarni o‘rganish va ularni bosqichma-bosqich bartaraf etish ishlari izchil davom ettirilishi ta’kidlandi.