Xalq deputatlari Ishtixon tumani Kengashining Korrupsiyaga qarshi kurashish va xavfsizlik masalalari bo‘yicha doimiy komissiyasining navbatdagi yig‘ilishi bo‘lib o‘tdi.

Yig‘ilish kun tartibiga muvofiq, Ishtixon tumanida 2025-yil davomida mahallalar kesimida jinoyatchilik holatini tahlil qilish, jinoyatlarning kelib chiqish sabablari va shart-sharoitlarini aniqlash bo‘yicha amalga oshirilgan ishlar yuzasidan O‘zbekiston mahallalari uyushmasining tuman bo‘limi boshlig‘i K.Yavkochdiyevning hisoboti eshitildi.

Hisobotda qayd etilishicha, O‘zbekiston Respublikasi Prezidentining 2025-yil 3-yanvardagi PQ–1-sonli qarori ijrosini ta’minlash maqsadida tuman ichki ishlar bo‘limi hamda hamkor tashkilotlar bilan birgalikda mahallalarda huquqbuzarliklarning barvaqt oldini olish, profilaktika tadbirlarini kuchaytirish va xavfsiz muhit yaratish borasida tizimli ishlar olib borilgan.

2025-yil yakunlariga ko‘ra, tumandagi 62 ta mahalla fuqarolar yig‘inidan:

38 tasida jinoyat sodir etilmagan,

20 tasida jinoyatchilik kamaygan,

4 ta mahalla “qizil toifa”ga kiritilgan (Yangikent, Ishtixon, Xalqobod, G‘.G‘ulom).

Mazkur hududlarda kriminogen vaziyatni yaxshilash bo‘yicha kompleks chora-tadbirlar amalga oshirilmoqda.

Shuningdek, profilaktika ishlari natijasida 2025-yilda 1641 nafar fuqaro profilaktik hisobdan chiqarilgan. Oilaviy ajrimlarning oldini olish borasida ham tizimli ishlar olib borilib, 101 ta ajrim yoqasidagi oila yarashtirilgan hamda bugungi kunda 13 ta mahalla ajrimdan holi hududga aylantirilgan.

Hisobotda qayd etilishicha, yil davomida oldini olish mumkin bo‘lgan jinoyatlar soni 78 tani tashkil etgan bo‘lib, ular orasida o‘g‘irlik, tan jarohati yetkazish va boshqa turdagi huquqbuzarliklar mavjud. Jinoyatlar tasnifiga ko‘ra, ularning asosiy qismi ijtimoiy xavfi katta bo‘lmagan va uncha og‘ir bo‘lmagan toifalarga to‘g‘ri keladi.

Komissiya a’zolari tomonidan mahallalarda xavfsiz muhitni mustahkamlash, jinoyatchilikning oldini olish, “mahalla yettiligi”, profilaktika inspektorlari hamda boshqa mas’ul idoralar o‘rtasidagi hamkorlikni yanada kuchaytirish yuzasidan tegishli tavsiyalar berildi.

Yig‘ilish yakunida mazkur masalani Xalq deputatlari Ishtixon tumani Kengashining navbatdagi sessiyasi kun tartibiga kiritish bo‘yicha takliflar ilgari surildi.