Payshanba — “Yoshlar kuni” munosabati bilan Zomin tumanida joylashgan Abu Ali ibn Sino nomidagi Jamoat salomatligi texnikumi binosida tuman yoshlari bilan uchrashuv tashkil etildi.

Unda Zomin tumani hokimi, tuman Kengashi deputati A. Abdug‘aniyev, Zomin tumani Ichki ishlar bo‘limi boshlig‘i I. Nurmatov, tuman prokurori X. Abdullayev hamda texnikum talabalari va faol yoshlar ishtirok etdi.

Uchrashuv davomida iqtidorli yoshlar o‘zlarining startap g‘oyalari, erishgan yutuqlari hamda kelgusidagi reja va tashabbuslari bilan o‘rtoqlashdilar. Yoshlarning innovatsion g‘oyalari va istiqbolli loyihalari muhokama qilinib, ularni qo‘llab-quvvatlash, zarur shart-sharoitlar yaratish masalalariga alohida e’tibor qaratildi.

Shuningdek, uchrashuv jarayonida yoshlarning murojaat va takliflari tinglanib, ularning muammolarini hal etish, sifatli ta’lim olish, kasb-hunar egallash, bandligini ta’minlash hamda tadbirkorlik faoliyatini rivojlantirish masalalari yuzasidan tegishli tavsiyalar berildi.

Ochiq va samimiy ruhda o‘tgan uchrashuv yakunida yoshlar tomonidan bildirilgan taklif va tashabbuslarni qo‘llab-quvvatlash, mavjud muammolarni tizimli ravishda hal etish hamda hududda yoshlar siyosatini yanada samarali amalga oshirish yuzasidan tegishli vazifalar belgilab olindi.