Tuman kengashi deputatlari tomonidan shu kunlarda mahallalar beshligi hisoboti eshitilmoqda. Bugun Quduqli mahallasi ma’sullarining hisoboti O‘zLiDeP deputatlik guruhi aʼzolari tomonidan tahlil qilindi.

Mahalla raisi Sherzod Mo‘minov 2023-yilda amalga oshirgan ishlari to‘g‘risida axborot berdi. Taʼkidlanishicha, aholini xatlov qilish jarayonida yashash sharoiti og‘ir, nizoli oilalardan 4 nafari yarashtirilgan. Hududdagi to‘rtta ichki yo‘llarga shag‘al yotg‘izilib, “Beshyog‘och” qabristonida hashar yo‘li bilan archa ko‘chatlari ekilgan.

Kun tartibidagi masala yuzasidan xotin-qizlar faoli Durdona O‘rinovaning hisoboti eshitildi. Qayd etilishicha, “Ayollar daftari”ning 4-bosqichi doirasida qaramog‘ida nogiron farzandi mavjud xotin-qizlarning 8 nafariga 1 200 000 so‘mdan moddiy yordam berilgan. 1- va 2-guruh nogironligi bo‘lgan xotin-qizlar va boquvchisi bo‘lmagan 26 nafar ayollarga ham bir martalik moddiy yordam ajratilgan.

Tadbirkorlik qilish uchun 7 nafar ayollarga tuman hokimligi tomonidan pishiriq pechi berilib, 41 nafari ishga joylashtirilgan. 4 nafar ayollarning uyi ta’mirlanib, 10 ga yaqin xotin-qizlarga 3 milion so‘mdan pul mablag‘i va oziq - ovqat mahsulotlari ajratilgan.

Tadbirda shu kabi hokim yordamchisi Dilshod Diyorov, yoshlar yetakchisi Zuhriddin Nosirov hamda profilaktika inspektori Ikrom Ergashevning hisoboti eshitilib, yo‘l qo‘yilgan kamchiliklarni bartaraf etish bo‘yicha fikr-mulohazalar bildirildi.

25-Nurafshon saylov okrugidan saylangan deputat N.To‘rayev tomonidan komissiya qarorlari ijrosi nazoratga olindi.