Mazkur tashabbus doirasida kutubxona uchun ajratilgan binoda zarur sharoitlar yaratilmoqda. Bu yerda aholining turli yosh toifalari uchun badiiy, ilmiy-ommabop, tarixiy va bolalar adabiyotlaridan iborat kitob fondini shakllantirish ko‘zda tutilgan.
Tashkil etilayotgan kutubxona mahalla aholisi uchun nafaqat kitob mutolaa qiladigan, balki turli ma’naviy-ma’rifiy tadbirlar, kitobxonlik kechalari va yoshlar bilan uchrashuvlar o‘tkaziladigan maskanga aylanishi kutilmoqda.
Mazkur jarayon bilan tuman Kengashi deputatlari Q. Chorshanbiyev, R. Mengziyayeva va D. Shoimqulovalar ham yaqindan tanishib, mahalla aholisi uchun yaratilayotgan sharoitlarni ko‘zdan kechirdilar. Deputatlar kutubxonani zarur adabiyotlar bilan boyitish, aholining, xususan, yoshlarning undan samarali foydalanishini ta’minlash bo‘yicha taklif va tavsiyalarini bildirdilar.
Bugun kitobxonlikni rivojlantirish — yosh avlodning bilimli, dunyoqarashi keng va ma’naviy yetuk bo‘lib voyaga yetishida muhim omillardan biridir. Yangiyer mahallasida tashkil etilayotgan yangi kutubxona ham ana shu ezgu maqsadga xizmat qiladigan muhim ma’rifat maskaniga aylanadi.
Kitob — tafakkur manbai, kutubxona esa ma’rifat maskanidir.