Xalq deputatlari Qo‘qon shahar Kengashi raisi O‘.Tojieva hamda Kengash kotibiyati mudiri A.Nosirov tomonidan Qo‘qon shahrining “Yog‘ bozori” MFY hududida joylashgan 5-sonli texnikumda “Tashabbusli byudjet – 2026” loyihasining 1-mavsumi doirasida amalga oshirilayotgan qurilish-ta’mirlash ishlari joyiga chiqqan holda o‘rganildi.

O‘rganish davomida texnikum binosining issiqlik tizimi, sport zali hamda hojatxonalarini ta’mirlash bo‘yicha olib borilayotgan ishlarning holati, loyiha ijrosi va belgilangan muddatlar ko‘zdan kechirildi.

Ma’lum qilinishicha, mazkur loyiha doirasidagi qurilish ishlarini “Qurilish zamini Qo‘qon” MChJ pudrat tashkiloti amalga oshirmoqda. Loyihaning umumiy qiymati 1,5 milliard so‘mni tashkil etadi.

Qurilish-ta’mirlash ishlarini 2026-yil noyabr oyining o‘rtalariga qadar yakunlash rejalashtirilgan.

O‘rganish jarayonida ishlarning loyiha talablariga muvofiq, sifatli va belgilangan muddatlarda bajarilishi, shuningdek, ta’lim muassasasida o‘quvchilar uchun qulay va xavfsiz sharoitlarni yaratish masalalariga alohida e’tibor qaratildi.

Mazkur loyiha Kengash deputatlari tomonidan nazoratga olinib, qurilish-ta’mirlash ishlarining o‘z vaqtida va sifatli yakunlanishi yuzasidan mas’ullar bilan tegishli vazifalar belgilab olindi.

Xalq deputatlari Qo‘qon shahar Kengashi