Xalq deputatlari Xorazm viloyati Kengashining 2026-yil 31-martdagi VII-20-37-12-0-K/26-son qaroriga muvofiq, Shovot tumanida "Yangi Oʻzbekiston qiyofasi" dasturi doirasida amalga oshirilayotgan infratuzilma loyihalarining ijrosi yuzasidan navbatdagi monitoring o‘tkazildi.
Monitoring Xalq deputatlari Shovot tumani Kengashi kotibiyati mudiri, 24-Gulshan saylov okrugi deputati Masharipov Izzat Masharipovich, 1-Komiljon Otaniyozov saylov okrugi deputati Kariyev Mansur Omongaldiyevich hamda 21-Monoq saylov okrugi deputati Sadullayev Oybek Yusubbayevich ishtirokida deputatlik okrugida amalga oshirildi.
O‘rganish davomida dastur doirasida 2,5 kilometr uzunlikdagi "Xorazm", "Xorazm-1" va "Quvonch-1" ko‘chalarida barpo etilayotgan piyodalar yo‘laklari qurilishi ko‘zdan kechirildi. Qurilish ishlari belgilangan loyiha va me’yoriy talablar asosida olib borilayotgani, ishlar sifati hamda bajarilish sur’atiga alohida e’tibor qaratildi.
Shuningdek, Monoq mahallasining turli hududlarida yo‘l infratuzilmasini yaxshilash, obodonlashtirish, qurilish va ta’mirlash ishlari izchil davom etmoqda. Mazkur bunyodkorlik ishlari mahalla aholisiga qulaylik yaratish, hududning zamonaviy qiyofasini shakllantirish hamda aholining turmush sifatini yanada yuksaltirishga xizmat qilmoqda.
Mahalla aholisi amalga oshirilayotgan bunyodkorlik va obodonlashtirish ishlarini katta mamnuniyat bilan kutib olmoqda. Ayniqsa, infratuzilmani rivojlantirishga qaratilgan ushbu loyihalar mamlakatimiz mustaqilligining 35 yilligi arafasida aholiga munosib tuhfa bo‘lib, "Yangi Oʻzbekiston" g‘oyasi amalda o‘z ifodasini topayotganining yorqin namunasidir.
Yurtimiz ravnaqi, mahallalarimiz obodligi va xalqimiz farovonligi yo‘lida amalga oshirilayotgan bunyodkorlik ishlari izchil davom etmoqda.