Оилалар даромадини оширишга амалий кўмак
Халқ депутатлари Янгиқўрғон тумани Кенгаши депутати, туман ҳокими Асадулла Нажмиддинов ижтимоий реестрга киритилган оилаларга субсидия асосида сув насосларини топшириш тадбирида иштирок этди.
Ўзбекистон Республикаси Президентининг 2026 йил 11 сентябрдаги ПФ–193-сонли Фармони ижроси доирасида Камбағалликни қисқартириш ва бандлик жамғармаси маблағлари ҳисобидан 7 та оилага сув насослари берилди.
Мазкур кўмак оилаларнинг томорқа ерларини суғориш имкониятларини яхшилаш, ердан самарали фойдаланиш ҳамда қишлоқ хўжалиги маҳсулотлари етиштириш орқали қўшимча даромад топишига қаратилган.
Тадбир давомида депутат томорқадан унумли фойдаланиш, оилаларнинг иқтисодий фаоллигини ошириш ва доимий даромад манбаларини яратиш муҳимлигини таъкидлади.
Бугунги кунда тумандаги 68 та маҳаллада 52 618 та хонадон мавжуд бўлиб, уларда 69,9 минг оила ва 248 минг нафар аҳоли истиқомат қилади. Шундан 4 176 та оиладаги 16 999 нафар фуқаро ижтимоий реестрга киритилган.
Бундай манзилли ёрдам оилаларнинг ўз меҳнати орқали даромадини ошириши, турмуш шароитини яхшилаши ҳамда иқтисодий барқарорликка эришишига хизмат қилади.