Deputat tiyisli taraw shólkem wákilleri menen birgelikte xalıq penen ushırasıw ótkerdi....

Xalıq deputatları Shımbay rayonlıq Keńesine 21-sanlı “Qarakól” saylaw okruginen saylanǵan deputat G.Eshanova “Qarakól” mákan puqaralar jıyınında tiyisli shólkem hám mákemelerdiń wákilleri menen birgelikte xalıq penen ushırasıw ótkerdi. Ushırasıwda  puqaralardıń múrájatları, pikir-usınısları hár tárepleme tıńlanıp, xalıqtı qıynap kiyatırǵan áhmiyetli máseleler boyınsha ashıq sóylesiwler alıp bardı. Puqaralar tárepinen bildirilgen múrájatlarda aymaqtaǵı sociallıq hám infrastrukturaǵa baylanıslı mashqalalar, kommunallıq xızmetlerdiń sapası, abadanlastırıw, ishki jollardıń jaǵdayı, elektr energiyası, ishimlik suwı támiynatı, bántlik hám basqa da máselelerge ayrıqsha itibar qaratıldı.

Sonday-aq, múrájatlardıń hár biri juwapker shólkem hám mákemelerdiń wákilleri qatnasıwında dodalanıp, mashqalalardı ornında úyreniw hám olardıń sheshimin támiyinlew boyınsha tiyisli ilajlar belgilep alındı.
Ushırasıw juwmaǵında kórilgen múrájatlardi qadaǵalawǵa alıw, olardı nızamlı hám ámeliy jaqtan sheshiw hám de puqaralar menen turaqlı qarım-qatnastı jolǵa qoyıw áhmiyetli ekenligi atap ótildi.
Sonıń menen birge, anıqlanǵan mashqalalar boyınsha juwapkerlerge tiyisli tapsırmalar hám usınıslar berildi.