Xalıq deputatları Bozataw rayonlıq Keńesi sekretariatınıń baslıǵı A.Ibragimov tárepinen Ózbekstan Respublikası Prezidentiniń 2026-jıl 11-sentyabrdegi PP-193-sanlı "Turaqlı jumıs orınların jaratıw hám kishi biznesti jedel rawajlandırıw arqalı xalıq dáramatların arttırıw ilajları haqqında"ǵı Pármanınıń mazmun-mánisi hám onda belgilengen wazıypalardıń rayon aymaǵında ámelge asırılıwın támiyinlew máseleleri boyınsha "Bozataw" PPJ máhálle baslıǵı, sociallıq xızmetker hám hákim járdemshisi menen sáwbet ótkerildi.
Sáwbetlesiwler dawamında máhállede xalıqtı turaqlı hám nátiyjeli jumıs penen támiyinlew, miynet bazarındaǵı imkaniyatlardan paydalanıw, kishi biznes hám isbilermenlikti rawajlandırıw arqalı shańaraq dáramatların arttırıw, sonıń menen birge, xalıqtı kásipke baǵdarlaw máselelerine ayrıqsha itibar qaratıldı.
Sonday-aq, máhállede sociallıq járdemge mútáj shańaraqlardı anıqlaw, olardıń ekonomikalıq imkaniyatların keńeytiw, kásip úyreniwine hám dáramat keltiretuǵın isbilermenlik túrlerin jolǵa qoyıwına járdem beriw boyınsha ámeldegi jumıslardıń nátiyjeliligi dodalandı.
Bas maqset - xalıqtıń ekonomikalıq belsendiligin arttırıw, turaqlı dáramat dáreklerin qáliplestiriw hám máhálle dárejesinde xalıqtıń turmıs sapasın jaqsılawǵa baǵdarlanǵan ilajlardıń nátiyjeli ámelge asırılıwın támiyinlew.