Unda 2026 yilning 1 may holatiga qadar Marg‘ilon shahri aholisi tomonidan O‘zbekiston Respublikasi Prezidenti Virtual va Xalq qabulxonalariga yuborilgan murojaatlar tahlili muhokama qilindi.

Yig‘ilishda kotibiyat mudiri A.Ermatov, doimiy komissiya a’zolari, ekspert maslahat guruhi hamda yoshlar maslahat guruhi vakillari ishtirok etdi. Majlisni doimiy komissiya raisi A.Mahkamov olib bordi.

Taqdim etilgan axborotga ko‘ra, 2026 yilning dastlabki to‘rt oyida Marg‘ilon shahri fuqarolari tomonidan Prezidentning Virtual va Xalq qabulxonalariga jami 1799 ta murojaat yo‘llangan. Bu ko‘rsatkich 2025 yilning mos davriga nisbatan 791 taga yoki 56,3 foizga oshgan. O‘tgan yilning shu davrida murojaatlar soni 959 tani tashkil etgan edi.
Kelib tushgan murojaatlarning 1443 tasi ko‘rib chiqilgan bo‘lib, shundan 1312 tasi qanoatlantirilgan. 564 ta murojaatdagi masalalar ijobiy hal etilgan. Shuningdek, yuzlab murojaatlar bo‘yicha fuqarolarga huquqiy tushuntirish va ma’lumotlar berilgan.
Tahlillarga ko‘ra, murojaatlarning asosiy qismi nafaqa va moddiy yordam tayinlash, gaz ta’minoti, aliment undirish, firibgarlik va surishtiruv ishlari, uy-joy masalalari hamda tibbiy yordam bilan bog‘liq muammolarni tashkil etmoqda. Ayniqsa, tabiiy gaz bosimi bilan bog‘liq muammolar va moddiy yordam masalalari bo‘yicha takroriy murojaatlar soni yuqoriligi qayd etildi.
Hisobotda takroriy murojaatlar masalasiga ham alohida e’tibor qaratildi. Jami murojaatlarning 254 tasi yoki 14,1 foizi takroriy murojaatlar ekani ma’lum qilindi. Eng ko‘p takroriy murojaatlar G‘uriavval, Yangi bog‘, Guliston, Zuhro, Qirguli va Chilonzor mahallalarida kuzatilgan.
Shuningdek, ayrim mahallalarda fuqarolar bilan ishlash tizimi yetarli darajada yo‘lga qo‘yilmagani tanqid qilindi. Mutasaddilar fikricha, “MFY yettiligi” xodimlari tomonidan murojaatlar bilan ishlashdagi sustkashlik sabab aholi muammolarini mahalla yoki sektor darajasida emas, to‘g‘ridan-to‘g‘ri Prezident Virtual qabulxonasi orqali hal qilishga urinmoqda.

Yig‘ilish davomida murojaatlarni joyida va tezkor hal etish, mahallalarda ommaviy qabullar samaradorligini oshirish hamda fuqarolar bilan ishlash tizimini takomillashtirish bo‘yicha taklif va tavsiyalar bildirildi.

Deputatlarga koʻra, aholining davlat idoralariga bo‘lgan ishonchini mustahkamlash va murojaatlar sonini kamaytirish uchun eng avvalo joylardagi mas’ul tashkilotlar faoliyatini kuchaytirish zarur.