O‘zbekiston Respublikasi Prezidenti Shavkat Mirziyoyevning Oliy Majlis va O‘zbekiston xalqiga yo‘llagan Murojaatnomasi hamda “O‘zbekiston – 2030” strategiyasida belgilangan ustuvor vazifalar ijrosini ta’minlash, ushbu muhim hujjatlarning mazmun-mohiyati va amaliy ahamiyatini keng jamoatchilikka yetkazish maqsadida Respublika hamda Toshkent viloyati hokimligi vakillaridan iborat ishchi guruh tomonidan joylarda tizimli uchrashuvlar tashkil etilmoqda. Ana shunday mazmunli uchrashuvlardan biri Bekobod shahar 9-sonli umumta’lim maktabi faollar zalida "Nurliyo‘l" va "Obodturmush" mahallalari aholisi bilan uchrashuv bo‘lib o‘tdi. Uchrashuvda Xalq deputatlari shahar kengashi deputati, ma’naviyat targ‘ibotchisi U.Abdunazarov Prezident Murojaatnomasida ilgari surilgan ijtimoiy-iqtisodiy islohotlar, aholi farovonligini oshirish, ta’lim sifatini yuksaltirish hamda mahallalarda sog‘lom ijtimoiy muhitni mustahkamlashga qaratilgan vazifalarni atroflicha tushuntirib o‘tdi. Shuningdek, “O‘zbekiston – 2030” strategiyasining asosiy yo‘nalishlari, uning amaliy ahamiyati hamda strategiyada belgilangan vazifalarni joylarda samarali amalga oshirish masalalariga alohida e’tibor qaratildi. Uchrashuv yakunida ishtirokchilar tomonidan bildirilgan taklif va mulohazalar kelgusidagi ishlar uchun muhim asos bo‘lib xizmat qilishi ta’kidlandi.