Delegatsiya dastlab Andijon viloyatining Oltinko‘l tumanida AT “Xalq banki” tomonidan charm poyabzal mahsulotlari ishlab chiqarishga ixtisoslashtirilgan “Charm-poyabzal” kichik sanoat zonasi loyihasi bilan tanishdi. Ushbu loyiha hududiy sanoat salohiyatini oshirish va mahalliy aholi bandligini ta’minlashga qaratilgan.

 Shuningdek, Oltinko‘l tumanidagi “Qo‘shtepa” mahallasida 15,9 gektar maydonda joylashgan, “Green World Landshaft” MCHJ tomonidan amalga oshirilayotgan ko‘chat yetishtirish va landshaftsozlik yo‘nalishidagi yirik loyiha ham deputatlar e’tiborida bo‘ldi. Loyihaning hududni obodonlashtirish va ekologik barqarorlikka qo‘shayotgan hissasi alohida qayd etildi.

Delegatsiya Oltinko‘l tumanida AT “Aloqa bank” ko‘magida tashkil etilayotgan “Mebelsozlik kompleksi” loyihasi bilan ham tanishdi. Mahalliy ishlab chiqaruvchilarning qo‘llab-quvvatlanayotgani va yangi ish o‘rinlarining yaratilayotgani e’tirof etildi.