O‘zbekiston Respublikasi Prezidentining 2023-yil 11-martdagi “Keksa avlod vakillarini har tomonlama qo‘llab-quvvatlash hamda ularning ijtimoiy faolligini oshirishga doir qo‘shimcha chora-tadbirlar to‘g‘risida”gi PQ-92-son qarori hamda 2022-yil 15-martdagi “Nuroniylarni har tomonlama qo‘llab-quvvatlash, ularning turmush darajasini oshirishga doir qo‘shimcha chora-tadbirlar to‘g‘risida”gi PQ-167-son qarorining 3-ilovasi 13-bandi ijrosini ta’minlash maqsadida joriy yilning 15-sentabr kuni Qo‘shtol mahalla fuqarolar yig‘inida “Qo‘sha qarish saodati” tadbiri o‘tkazildi.

Tadbirda uzoq yillar davomida birgalikda umr kechirib, qo‘sha qarigan keksalarning ibratli hayot yo‘lini yosh avlodga namuna sifatida targ‘ib etishga alohida e’tibor qaratildi.

Tadbirga 55 yildan buyon birgalikda umrguzaronlik qilib kelayotgan Toshboyev Nishonboy va Toshboyeva Ma’rifat, 56 yillik oilaviy hayot yo‘lini bosib o‘tgan Qosim Niyozov va O‘rozgul Niyozova , shuningdek, 58 yildan buyon birgalikda hayot kechirib kelayotgan Shavkat Nizomov va Jumagullar Nizomova taklif etildi.

Tadbir davomida ushbu oilalar vakillari o‘zlarining hayot yo‘llari, oilada baxt va totuvlikni ta’minlashda er-xotinning o‘rni, farzand tarbiyasi hamda oilaviy qadriyatlarning ahamiyati haqida so‘zlab berdilar.

Bugungi kunda mazkur oilalarning farzandlari mamlakatimizning turli sohalarida samarali mehnat qilib, yurtimizning ijtimoiy-iqtisodiy rivojiga munosib hissa qo‘shib kelmoqda.

Tadbirda tuman Kengashi deputati, “Nuroniy” jamg‘armasi tuman bo‘limi raisi O'. Akkulov ishtirok etib, tadbirga taklif etilgan oilalarga esdalik sovg‘alari va tashakkurnomalar topshirdi.

Mazkur tadbir nuroniylarning boy hayotiy tajribasini yosh avlodga yetkazish, oilaviy qadriyatlarni mustahkamlash hamda jamiyatda mehr-oqibat va o‘zaro hurmat muhitini yanada rivojlantirishga xizmat qiladi.