O‘zbekiston Respublikasi Prezidentining 2026-yil 5-fevraldagi PQ-49-son Farmoniga asosan tumandagi “og‘ir mahalla”da amalga oshirilayotgan qurilish-ta’mirlash ishlari Xalq deputatlari tuman Kengashi raisi O.Babayev va kotibiyat xodimi N.Kurganova tomonlaridan o‘rganildi.

🔺Xalq deputatlari Bo‘stonliq tumani Kengashning 2026-yil 24-fevraldagi VII-27-10-10-136-K/26-sonli qaroriga asosan tumanning “Bog‘iston” mahallasi “og‘ir mahalla” sifatida e’tirof etilgan. Rejaga ko‘ra, mahallaga jami 4,5 mlrd so‘m mablag‘ yo‘naltirilib, ushbu mablag‘lar hisobidan elektr ta’minotini yaxshilash, tungi yoritish tizimini kengaytirish, piyodalar yo‘laklarini barpo etish, ichki yo‘llarni asfaltlash, quyosh fotoelektr stansiyasi qurish hamda hududni obodonlashtirish ishlarini amalga oshirish belgilangan.

Mahalla raisi Sh.Nishonov ishtirokida o‘tkazilgan o‘rganish davomida rejalashtirilgan ishlarning bir qismi amalga oshirilgani kuzatildi. Xususan, mahallada piyodalar yo‘laklari qurilgan, aholi xonadonlari va ijtimoiy obyektlarga qulay harakatlanish imkoniyatlari yaxshilangan. Elektr ta’minotini barqarorlashtirish maqsadida 1 ta 400 kVt quvvatga ega transformator o‘rnatilgan. Shuningdek, mahalla hududida 40 ta tungi chiroq o‘rnatilib, ko‘chalarning kechki vaqtda yoritilishi yaxshilangan.

Elektr tarmoqlarini modernizatsiya qilish doirasida 27 ta beton tayanch ustunlari o‘rnatilib, 1,3 km SIP tarmoqlari tortilgan. Mazkur ishlar elektr energiyasini aholiga yanada barqaror yetkazib berish va tarmoqlardagi mavjud muammolarni kamaytirishga qaratilgan. Shuningdek, mahallaga to‘liq internet tarmog‘i tortilishi natijasida aholining zamonaviy axborot-kommunikatsiya xizmatlaridan foydalanish imkoniyatlari kengaygani qayd etildi.

🔺O‘rganish kunida mahalla ichki yo‘llarini obodonlashtirish ishlarining muhim qismi bo‘lgan asfaltlashtirish ishlari davom ettirilayotgani kuzatildi. Deputat tomonidan mazkur ishlarni belgilangan hajmda, sifatli va o‘z vaqtida yakunlash muhimligi ta’kidlandi. Shu bilan birga, mahallada aholiga qushimcha qulayliklar yaratish maqsadida mahalla guzari tashkil etish uchun belgilangan hudud va mavjud imkoniyatlar o‘rganildi.

🔺Deputat tomonidan amalga oshirilayotgan qurilish-ta’mirlash ishlarining sifatiga, ajratilgan mablag‘larning maqsadli sarflanishiga, obyektlarning belgilangan muddatlarda foydalanishga topshirilishiga hamda yaratilgan infratuzilma aholiga amalda qulaylik berishiga alohida e’tibor qaratish zarurligi ta’kidlandi.